79806 ः पंतप्रधान नरेंद्र मोदी यांच्या दौरा बंदोबस्त वाटपासाठी पोलिस कवायत मैदानावर लगबग सुरू होती.

पंतप्रधान मोदी यांच्या सभास्थळी ड्रोनला बंदी
विमानतळापासून सभास्थळापर्यंत कडेकोट बंदोबस्त; आज दौऱ्याची रंगीत तालीम

सकाळ वृत्तसेवा
कोल्हापूर, ता. २५ : महायुतीच्या उमेदवारांच्या प्रचारासाठी पंतप्रधान नरेंद्र मोदी शनिवारी (ता. २७) कोल्हापुरात येत आहेत. सुरक्षेच्या कारणास्तव दौरा कालावधीत ड्रोन कॅमेरा चित्रीकरणास बंदी घातली आहे. पोलिस प्रशानानकडून दौऱ्याच्या अनुषंगाने गुरुवारी बंदोबस्ताचे वाटप करण्यात आले. विमानतळापासून तपोवन मैदान येथील सभास्थळापर्यंत मार्गांची तपासणी करण्यात आली. शुक्रवारी या मार्गावरून रंगीत तालीम करण्यात येणार आहे. बंदोबस्ताला तैनात करण्यात येणाऱ्या पोलिसांना पोलिस अधीक्षक महेंद्र पंडित यांनी सूचना केल्या.
पंतप्रधान मोदी यांच्यासोबत सभेसाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार उपस्थित असणार आहेत. सभेच्या पार्श्वभूमीवर गुरुवारी अलंकार हॉल येथे बंदोबस्ताचे वाटप केले. विमानतळापासून सभास्थळापर्यंतच्या मार्गावरील अधिकारी, कर्मचाऱ्यांची जबाबदारी निश्चित केली. पंतप्रधानांना असलेली झेड प्लस सुरक्षा व ए.एस.एल. सुरक्षा यंत्रणेमुळे विमानतळ परिसर व संपूर्ण शहरात ड्रोन कॅमेऱ्याद्वारे कोणासही चित्रीकरण करता येणार नसल्याचा आदेश अपर जिल्हादंडाधिकारी संजय तेली यांनी काढला. याची अंमलबजावणी करण्यात येणार असल्याचे पोलिस प्रशासनाकडून सांगण्यात आले.
बंदोबस्तातील कर्मचाऱ्यांनी नेमणुकीचे ठिकाण सोडू नये, संशयास्पद व्यक्ती आढळल्यास त्याची माहिती तातडीने स्थानिक पोलिस ठाण्यात द्यावी, व्हीआयपी मार्गावर कोठेही वाहतूक कोंडी होणार नाही याची दक्षता घ्यावी, अशा सूचना वरिष्ठ अधिकाऱ्यांकडून देण्यात आल्या.

चौकट
पोलिसांकडून आज मंचाची पाहणी
महायुतीची जाहीर सभा शनिवारी (ता. २७) सायंकाळी पाच वाजता तपोवन मैदानावर होत आहे. येथे उभारण्यात येणाऱ्या मंचाची पाहणी पोलिस प्रशासनाकडून आज केली जाणार आहे.