विषारी, विखारी प्रचाराला
वेळीच रोखण्याची गरज

समाजवादी प्रबोधिनीच्या चर्चासत्रात सूर

इचलकरंजी, ता. २९ ः लोकसभेच्या प्रचाराची रणधुमाळी सुरू आहे. यामध्ये विविध समाज माध्यमांमध्ये आणि जाहीर भाषणांमध्ये होणारा प्रचार सत्यापेक्षा असत्याच्या अंगाने वेग घेतो आहे. तो विषारी व विखारी होत आहे. त्याला वेळीच आवर घातला गेला नाही तर त्याचे गंभीर परिणाम भविष्यात देशाला भोगावे लागतील, असे मत समाजवादी प्रबोधिनीच्या साप्ताहिक चर्चासत्रात ‘प्रचारातील वास्तविकता व अवास्तविकता’ विषयावरील चर्चेतून पुढे आले. चर्चासत्रात प्रसाद कुलकर्णी, शशांक बावचकर, प्रा. रमेश लवटे, तुकाराम अपराध, पांडुरंग पिसे, शकील मुल्ला, सचिन पाटोळे, शहाजी धस्ते, देवदत्त कुंभार, मनोहर जोशी आदींनी सहभाग घेतला.
एका संगणक सुरक्षा कंपनीच्या अहवालानुसार, देशातील ७५ टक्के लोकांपर्यंत समाजमाध्यमांतून धादांत खोट्या स्वरूपाची माहिती पोहचत आहे. निरनिराळ्या राजकीय पक्षांचे आयटी सेल हा खोटेपणाचा आजार खरेपणाने पसरवित आहेत. सत्यता न पडताळता माहिती पुढे प्रसारित करत राहणे योग्य नाही. त्यामुळे समाजमाध्यमातून वस्तुस्थितीची तपासणी करण्याकडेही गांभीर्याने लक्ष दिले पाहिजे. एकीकडे कृत्रिम बुद्धिमत्तेचा विकासासाठी वापर करण्याची चर्चा सुरू असताना दुसरीकडे नैसर्गिक बुद्धिमत्ता विकृतीकडे नेणे फारच घातक ठरेल, अशी भीती चर्चासत्रात व्यक्त करण्यात आली.