कागदपत्र देण्यास हिटणी
दूध संस्थेकडून टाळाटाळ
सकाळ वृत्तसेवा
गडहिंग्लज, ता. १२ ः हिटणी (ता. गडहिंग्लज) येथील श्री बसवेश्वर सहकारी दूध संस्थेच्या व्यवस्थापनाकडून कोर्ट कामासाठी आवश्यक कागदपत्रे देण्यास टाळाटाळ करीत असल्याची तक्रार निंगाप्पा नंदगावी यांनी विभागीय उपनिबंधकांकडे केली आहे.
या निवेदनात म्हटले आहे की, २०२०-२१ मध्ये निवडणूक जाहीर झाल्यानंतर संचालक मंडळाची बैठक घेऊन त्यात निंगाप्पा नंदगावी यांची बनावट सही करून दूध उत्पादक नसणाऱ्या ३८ जणांना नवीन सभासदत्व दिल्याचा आरोप आहे. या प्रकरणी नंदगावी उच्च न्यायालयात दावा दाखल करणार आहेत. त्यासाठी आवश्यक कागदपत्रांची मागणी संस्थेकडे केली. परंतु उडवा-उडवीची उत्तरे देत संस्थेने कागदपत्रे दिलेली नाहीत. काही कागदपत्रे दिली असली तरी नवीन सभासद केलेल्या बैठकीचे इतिवृत्त मात्र देण्यास टाळाटाळ करीत असल्याचा आरोप आहे. याबाबत कोल्हापूर सहायक निबंधकांकडे मागणी केल्यानंतर त्यांनी संस्थेला कागदपत्रे देण्याचे निर्देश दिले. तरीसुद्धा कागदपत्रे दिली नसून सहायक निबंधकांच्या आदेशाला केराची टोपली दाखविली आहे. यामुळे संस्थेवर कायदेशीर कारवाई करून कागदपत्रे देण्यासंदर्भात आदेश व्हावेत, अशी मागणी केली आहे; अन्यथा उपोषणाचा इशारा दिला आहे.
...
सर्व कागदपत्रे सादर ः सचिव
सचिव शिवाजी व्हंजी म्हणाले, ‘नवे सभासद कायदेशीरच केले आहेत. त्यावर नंदगावी यांनी सहायक निबंधकांकडे घेतलेल्या हरकतीमध्ये संस्थेच्या बाजूने निकाल लागला आहे. नंदगावी यांनी मागणी केलेली सर्व कागदपत्रे सहायक निबंधकांकडे यापूर्वीच सादर केली असून नव्याने केलेल्या सभासदांचे इतिवृत्तही दोन दिवसांपूर्वीच जमा केले आहे. यामुळे संस्थेकडून कागदपत्रे मिळालेली नाहीत आणि बनावट सहीचा आरोपही चुकीचा आहे.