शहरात आढळले डेंगीचे पाच रुग्ण
आरोग्य विभाग सतर्क; पुढील आठवड्यानंतर पाहणीचे नियोजन

कोल्हापूर, ता. १३ ः महिनाभरात तपासणी झालेल्या नमुन्यांमधून शहरात पाच डेंगीचे रुग्ण आढळले. खासगी प्रयोगशाळेत तपासणीनंतर आढळणाऱ्या डेंगीसदृश रुग्णांची संख्या जास्त आहे. त्यामुळे महापालिकेचा आरोग्य विभाग सतर्क झाला असून, पुढील आठवड्यानंतर पाहणीचे नियोजन केले जात आहे.
वळीव पावसांना सुरुवात झाली आहे. त्याचे पाणी टायर तसेच घराजवळील इतर साहित्यात साचत आहे. त्या पाण्यात डासांच्या अळ्या तयार होऊन डास तयार होतात. यामुळे डेंगीचे रुग्ण सापडण्याची शक्यता जास्त असते. पावसाळ्यात महापालिकेच्या वतीने तीनशेवर नमुने तपासणीला सीपीआरच्या प्रयोगशाळेत पाठवले जातात. सध्या शंभरावर नमुने पाठवले जात आहेत. गेल्या महिन्यापासून पाठवलेल्या नमुन्यातून वेगवेगळ्या भागातील पाच डेंगीचे रुग्ण आढळले आहेत. यानुसार आठवड्याला एक रुग्ण सापडत आहे. ही संख्या जास्त नसल्याचे महापालिकेच्या सूत्रांचे मत आहे. मात्र, खासगी प्रयोगशाळेत तपासणी केल्यानंतर डेंगीसदृ‍श रुग्णांची संख्या जास्त असल्याचे समजते. त्यामुळे ताप, कणकण आलेले नागरिकही डेंगी असल्याचे समजून तपासणी करून घेत आहेत.
वळीव तसेच मॉन्सून सुरू झाल्यानंतर साचणाऱ्या पाण्यातून डास तयार होत असल्याने मे अखेरीला महापालिकेच्या आरोग्य विभागाकडून पाहणीस सुरुवात केली जाते. पाणी साचणारी भांडी रिकामी करायला लावली जातात. त्यासाठी आरोग्य विभाग आताच सतर्क झाला आहे. या आठवड्यात बैठक घेण्यात येत असून, त्यानंतर पाहणींचे नियोजन केले जाणार आहे.