21554
...
प्रा. डॉ. चंद्रकुमार नलगे यांच्या
शंभराव्या पुस्तकाचे २६ मेला प्रकाशन
साहित्यनिर्मितीचा शतकोत्सव सोहळा साजरा होणार
सकाळ वृत्तसेवा
कोल्हापूर, ता. १३ ः महाराष्ट्र शासनाच्या साहित्य क्षेत्रातील प्रतिष्ठेचा विं. दा. करंदीकर जीवनगौरव पुरस्कारप्राप्त ज्येष्ठ साहित्यिक प्रा. डॉ. चंद्रकुमार नलगे यांच्या शंभराव्या पुस्तकाचे प्रकाशन २६ रोजी होणार आहे. यानिमित्ताने प्रा. डॉ. नलगे यांच्या ग्रंथलेखनाचा शतकपूर्ती सोहळा साजरा करण्याचा निर्णय आज झालेल्या बैठकीत झाला. बैठकीला शहर आणि जिल्ह्यातील पंचवीसहून अधिक साहित्यिक, सांस्कृतिक, शैक्षणिक व सामाजिक संस्थांचे प्रतिनिधी उपस्थित होते.
प्रा. डॉ. नलगे यांनी शंभरहून अधिक पुस्तकांचे लेखन केले. अनेक पुरस्कारांनी त्यांचा गौरव झाला. त्याचबरोबरीने त्यांनी दक्षिण महाराष्ट्रातील अनेक लेखकांना प्रोत्साहन दिले, लिहिते केले. साहजिकच प्रा. डॉ. नलगे यांच्याशी स्नेह असणारा गोतावळा राज्यभरात आहे. ही सारी मंडळी शतकपूर्ती सोहळ्यानिमित्त एकवटणार आहेत. दक्षिण महाराष्ट्र साहित्य सभा, करवीर नगर वाचन मंदिर, करवीर साहित्य परिषद, व्हिजन प्रकाशन (गडहिंग्लज), स्त्रीसाहित्य मंडळ आदी पंचवीसहून अधिक संस्थांचा सोहळ्यात सक्रिय सहभाग असणार आहे. दरम्यान, आज झालेल्या पूर्वतयारी बैठकीत विविध समित्यांची स्थापना झाली. सोहळ्याची अंतिम कार्यक्रम पत्रिका लवकरच जाहीर केली जाणार आहे.