हरपवडे मंदिरप्रश्नी
कोणताही तोडगा नाही

आजऱ्यात बैठक ः दोन दिवसांत निर्णयाची ग्वाही

सकाळ वृत्तसेवा

आजरा, ता. १३ ः हरपवडे (ता. आजरा) येथील ग्रामदैवत श्री रासुबाई देवीचे मंदिरप्रश्नी आज केवळ चर्चा झाली. याबाबत कोणताही तोडगा निघाला नाही. पश्चिम महाराष्ट्र देवस्थान समितीच्या प्रतिनिधींनी वरिष्ठांशी चर्चा करून दोन दिवसांत निर्णय देऊ, असे आश्वासन ग्रामस्थांना दिले. त्यामुळे कोणताही निर्णय न होता बैठक संपली.
ग्रामदैवत रासुबाई मंदिराचे कुलुप काढून ते भाविकांसाठी खुले करावे; अशी मागणी हरपवडेच्या माजी सरपंच वैशाली देवीदास गुरव, देवदास बळवंत गुरव, बाळासो मारुती संकपाळ, अनुसया बाळासो संकपाळ व ग्रामस्थांनी केली होती. याबाबत जिल्हाधिकाऱ्यांना निवेदन देऊन लोकसभा निवडणूक मतदानावर बहिष्कार घालणार असल्याचा इशारा दिला होता. प्रशासनाने लेखी पत्र देऊन बैठक घेण्याचे आश्वासन दिले होते. त्यानुसार तहसीलदार कार्यालयात बैठक झाली. तहसीलदार समीर माने अध्यक्षस्थानी होते. पश्चिम महाराष्ट्र देवस्थान समिती; कोल्हापूर यांच्याकडे देखभाल दुरुस्तीसाठी असलेल्या मंदिराची स्थानिक व्यवस्थापन समिती काम पाहते. स्थानिक देवस्थान समिती, हरपवडे व पुजाऱ्यांमध्ये वाद होऊन मंदिराला टाळा ठोकले आहे. सहा महिने मंदिर कुलूपबंद आहेत. रासुबाईच्या भक्तांना अडचण निर्माण झाल्याचे गाऱ्हाणे ग्रामस्थांनी मांडले. पश्चिम महाराष्ट्र देवस्थान व्यवस्थापन समितीचे पदाधिकारी श्री. दिंडे, उत्तम मिटके यांनी वरिष्ठांशी चर्चा करून दोन दिवसांत निर्णय देणार असल्याचे सांगितले. नायब तहसीलदार म्हाळसाकांत देसाई, ग्रामस्थ उपस्थित होते.