पशुगणनेसाठी महापालिका कर्मचाऱ्यांची मागणी
वीस जणांची घेणार मदत : जनावरांचे टॅगिंग करण्याचे आवाहन
संदीप जगताप : सकाळ वृत्तसेवा
इचलकरंजी, ता. २१ : पशुसंवर्धन विभागाकडून पशुधन गणनेची तयारी सुरू केली आहे. त्यानुसार विभागाकडून पशुधन गणनेसाठी इचलकरंजी महापालिका प्रशासनाकडे कर्मचाऱ्‍यांची मागणी केली आहे. नॅशनल डिजिटल लाइव्हस्टॉक मिशन (एनडीएलएम) अंतर्गत ‘भारत पशुधन’ प्रणाली कार्यान्वित केली आहे. यामध्ये ईअर टॅगिंग (१२ अंकी बार कोड) करून पशुधनाच्या नोंदी घेण्यात येणार आहेत. त्यासाठी २० प्रशिक्षित कर्मचाऱ्‍यांची मदत घेण्यात येणार आहे. पशुपालकांनी आपल्या जनावरांची नोंद टॅगिंग करून घ्यावी, असे आवाहन पशुसंवर्धन विभागाकडून करण्यात आले आहे.
पशुगणना दर पाच वर्षांनी केली जाते. यंदाच्या पशुगणनेच्या तयारीला पशुसंवर्धन विभाग लागला आहे. त्यानुसार प्राथमिक स्वरूपाची माहिती नोंद करण्याचे काम सुरू आहे. पशुसंवर्धन विभागाकडून एक जूनपासून जनावरांच्‍या ईअर टॅगिंगची सक्ती केली आहे. ईअर टॅगिंग असल्यास शासनाच्या योजना व उपचारासाठी पात्र ठरणार आहेत. पशुधन गणनेसाठी पशुवैद्यकीय पदवी असलेल्या कर्मचाऱ्‍यांची नियुक्ती करण्यात येणार आहे. तसेच शहरी भागात चार हजार तर ग्रामीण भागामध्ये तीन हजार कुटुंबांसाठी एका कर्मचारी असणार आहे. इचलकरंजी शहरामधील पशुधन गणनेसाठी २० पशुवैद्यकीय कर्मचाऱ्‍यांची आवश्यकता असल्याने खासगी पशुवैद्यकीय डॉक्टरांची मदत घेण्यात येणार आहे.
------------------------------
२०१९ च्या नोंदणीनुसार पशूंची संख्या
नोंदीत जनावरे*इचलकरंजी*चंदूर*कबनूर*
गायी*१२२७*३७८*५५५*
म्हैस*१६९१*१००५*३८३*
शेळी*११८५*८८२*--*
एकूण*४१०३*२२६५*९३८*

---------------------------
शासनाने जनावरांच्या जन्म-मृत्यू नोंदणी, प्रतिबंधात्मक लसीकरण व औषधोपचार, वंध्यत्व उपचार, मालकी हक्क हस्तांतरणासाठी ईअर टॅगिंग (१२ अंकी बार कोड) सक्तीचे केले आहे. त्यामुळे पशुपालकांनी ईअर टॅगिंग करणे बंधनकारक आहे.
-डॉ. आर. बी. जंगम, सहायक आयुक्त, पशुसंवर्धन विभाग