अडकूर येथे कोल्ह्याचा तिघांवर हल्ला

चंदगड ः अडकूर - विंझणे मार्गावर ‘बांदेसूर’ नावाच्या शेतात कोल्ह्याने ठराविक अंतराने तिघांवर हल्ला करून जखमी केले. वंदना श्रीकांत अंबिटकर (वय ४५), रेश्मा सुरेश अंबिटकर (१५) व विष्णू रामू भेकणे (५०, तिघेही रा. अडकूर, ता. चंदगड) अशी जखमींची नावे आहेत. त्यांच्यावर गडहिंग्लज येथील रुग्णालयात उपचार सुरू आहेत. दरम्यान, काही काळाने कोल्ह्याचाही शेतवडीतच मृत्यू झाला. अडकूर ग्रामस्थांची विंझणे मार्गावर शेती आहे. वंदना अंबिटकर या शेताकडे जात असताना अचानकपणे उसातून बाहेर पडलेल्या कोल्ह्याने त्यांच्या हाताचा चावा घेतला. त्यानंतर काही वेळाने याच मार्गाने जाणाऱ्या रेश्मा अंबिटकर हिलाही तशाच प्रकारे चावा घेऊन जखमी केले. त्यांच्यावर अडकूर येथील प्राथमिक आरोग्य केंद्रात उपचार करून पुढील उपचारासाठी गडहिंग्लज उपजिल्हा रुग्णालयात पाठवण्यात आले. दरम्यान, काही वेळाने विष्णू भेकणे यांच्यावरही याच कोल्ह्याने हल्ला केला.