जिल्ह्यातील हत्तीरोग रुग्णांना
दिव्यांग दाखल्यांचे वितरण
सकाळ वृत्तसेवा
कोल्हापूर, ता. २८ : जिल्हा हिवताप विभागातर्फे जिल्ह्यातील हत्तीरोग रुग्णांना दिव्यांगत्वाचे दाखले देण्यात आले. सीपीआर रुग्णालयाचे वैद्यकीय अधीक्षक डॉ. शिशीर मिरगुंडे यांच्या हस्ते या दाखल्याचे वाटप झाले.
राज्य शासनातर्फे दिव्यांगाना दाखले देण्यात येतात. यात हत्तीरोगांचाही समावेश झाला आहे. त्यानुसार हिवताप विभागाकडे जिल्ह्यातील २६ हत्तीरोग रुग्णाची नोंद आहे. यापैकी २२ रुग्णांना दिव्यांगाचे प्रमाणपत्र देण्यात आले. त्यासाठी सीपीआर रुग्णालयातील वैद्यकीय तज्‍ज्ञांकडून या रुग्णांची आरोग्य तपासणी करण्यात आली, तसेच हिवताप विभागाने या रुग्णांना हिवताप झाल्याचे निदान केले. त्यानुसार या रुग्णांचा दिव्यांग व्यक्तीसाठी देण्यात येणारे प्रमाणपत्र देण्यात आले. राज्य शासनाच्या आदेशानुसार हत्ती रोग झालेल्या रुग्णांनाही दिव्यांगाच्या सवलतींचा लाभ घेता येणे शक्य होणार आहे. यावेळी झालेल्या कार्यक्रमात जिल्हा हिवताप अधिकारी डॉ. विनोद मोरे यांनीही हत्तीरोग रुग्णांना मार्गदर्शन केले. सहायक जिल्हा हिवताप अधिकारी जे. के. कांबळे यांनी आभार मानले. डॉ. सागर नाईक, नितीन कांबळे, विलास चौगुले, राहुल डोंगळे, अमृत सुतार, एस. पी. चिखले, शंकर कुंभार, जावेद मुल्ला आदी उपस्थित होते.