जिल्हा परिषदेमध्ये आजपासून ‘ई ऑफिस’ प्रणाली
कार्तिकेयन एस. यांची माहिती : पंधरा दिवसांत ४८२ ई ऑफिस फाईल्सची निर्मिती

कोल्हापूर, ता. ३१ : जिल्हा परिषदेमध्ये उद्यापासून ई ऑफिस प्रणाली कार्यान्वित केली जाणार आहे. ऑफलाईन आवक-जावकऐवजी ऑनलाईन आवक-जावक घेतली जाणार आहे. सामान्य प्रशासन विभागाकडे प्रायोगिक तत्त्वावर सुरू झालेली ई ऑफिस प्रणाली आता सर्व विभागात कार्यान्वित करण्याचे काम सुरू आहे. गेल्या १५ दिवसांत ४८२ फाईल्स ई ऑफिस प्रणालीतून तयार केल्या आहेत. यामधील १८८ फाईल्स निर्गत झाल्या आहेत. २९४ फाईल्सवर सध्या कार्यवाही सुरू असल्याची माहिती जिल्हा परिषदेचे मुख्य कार्यकारी अधिकारी कार्तिकेयन एस. यांनी आज दिली.
ते म्हणाले, ‘जिल्हा परिषद ई ऑफिस प्रणालीचे सर्व विभागातील कर्मचाऱ्यांना प्रशिक्षण दिले आहे. ई ऑफिस फाईल्स प्रणालीमध्ये कोल्हापूर जिल्हा परिषद महाराष्ट्रात आघाडीवर आहे. राज्यातील पहिल्या दहा जिल्ह्यांमध्ये कोल्हापूरचा समावेश आहे. जिल्हा परिषदेच्या कामकाजात संगणकाचा जास्तीत जास्त वापर करून शासकीय कामकाज गतिमान केले जाणार आहे. प्रत्येक कामात सुसूत्रता आणली जाणार आहे. दस्तऐवज व माहिती सुरक्षित आणि जलद गतीने मिळाले पाहिजेत. उद्या (ता. १) पासून ऑफलाईन फाइल स्वीकारली जाणार नाही. ऑनलाइन टपाल देण्यासाठी सर्वसामान्यांना काही दिवस मदत केली जाईल. विभागाचे सर्व प्रश्न सोडवले आहेत. एक महिन्यात, सर्व जुनी कागदपत्रे स्कॅन करण्याचा प्रयत्न केला जाणार आहे. पुढील टप्प्यात बीडीओ कार्यालय देखील ई ऑफिसमध्ये एकत्रित केले जाईल.’