अभ्यासक्रमात संविधानाचा
समावेश करा : संग्राम सावंत

कोल्हापूर, ता. १ : ‘‘शालेय अभ्यासक्रमात मनुस्मृतीचा नाही तर, भारतीय संविधानाचा समावेश करा,’’ अशी मागणी लोकशाहीर अण्णाभाऊ साठे संविधान गट व मुक्ती संघर्ष समितीचे राज्याध्यक्ष संग्राम सावंत यांनी केली.
मनुस्मृतीचा शालेय अभ्यासक्रमात समावेशाचा शासनाने प्रयत्न सुरु आहे. त्याचा निषेध नोंदवण्यासाठी राजारामपुरीत लोकशाहीर अण्णा भाऊ साठे संविधान गट आणि मुक्ती संघर्ष समितीतर्फे रॅली काढली. शाहू मिल येथे आंदोलन केले. संविधान गटातील व मुक्ती संघर्ष समिती, इतर संघटना संस्थांचे पदाधिकारी, सदस्य उपस्थित होते.
श्री. सावंत म्हणाले, ‘‘महाराष्ट्र शासनाला भारतीय शिक्षण व्यवस्थेत शालेय अभ्यासक्रमात समाविष्ठ करावयाचा असेल तर भारतीय संविधानाचा समावेश करावा. मनुस्मृतीच्या कायद्याचा उपयोग करुन भारतीय समाजाला गुलाम बनविण्याची प्रक्रिया पुन्हा सुरू झाली आहे. ही थांबवण्यासाठी आम्ही भारतीय संविधानाचा जागर घेऊन विरोध करणार आहोत.’’
डॉ. माधुरी चौगले म्हणाल्या, ‘‘स्त्रियांना शुद्र म्हणणाऱ्या मनुस्मृतीच्या काळ्या कायद्याचा धिक्कार करतो.’’ दाविद भोरे म्हणाले, ‘‘मनुस्मृतीच्या कायद्याचा शालेय अभ्यासक्रमात समावेश करुन लहान मुलांपासून ते कॉलेज जीवनातील मुलांच्या डोक्यामध्ये विष टाकण्याचे काम शासन करत आहे का? संवैधानिक मार्गाने याचा निषेध तर करणारच आहोत आणि विरोध करुन जिल्ह्यात जनआंदोलन करू.’’
यावेळी विद्या शिंदे, शेखर कवाळे, अनिल कवाळे, बाळू कवाळे, अर्जुन बुचडे, महावीर दाभाडे, मंगल चौगुले, सुनीता रणदिवे, पौर्णिमा जाधव, रेखा दुबळे, गीता जाधव, शोभा साठे, विमल गरदे, शारदा बेळुंके, कल्पना कांबळे, सीमा बुचडे, मंगला उघडे उपस्थित होते. भारतीय संविधानाचे मूल्य आणि तत्त्वांचा समावेश करा. बालवाडीपासून ते एम.ए.एम., सीओएम., एमएससी या वर्गासाठी अभ्यासक्रमात भारतीय संविधानाचा समावेश व्हावा, अशी मागणी केली. लोकशाहीर अण्णा भाऊ साठे स्मारक येथे सांगता सभा झाली.