87262
सूर्यकांत मांडरे

अभिनेते सूर्यकांत मांडरे यांच्या
स्मृतींना मिळणार उजाळा
सकाळ वृत्तसेवा
कोल्हापूर, ता. १ ः मराठी चित्रपटसृष्टीतील प्रसिध्द अभिनेते सूर्यकांत मांडरे यांची उद्या (ता. २) जयंती असून त्यानिमित्ताने त्यांच्या विविध स्मृतींना उजाळा मिळणार आहे. याबाबतची माहिती स्वरुपा मांडरे-पोरे यांनी दिली.
मराठी चित्रपटसृष्टीत चंद्रकांत-सूर्यकांत या कोल्हापूरच्या दोन रांगड्या बंधूंनी मोठे योगदान दिले. छत्रपती शिवाजी महाराज, छत्रपती संभाजी महाराज अशा त्यांच्या भूमिकांनी मराठी प्रेक्षकांच्या मनावर अधिराज्य केले. सूर्यकांत मांडरे पाणीदार बोलके डोळे, मर्दानी बलदंड शरीर आणि रुबाबदार चालणे त्यामुळे ते शिवाजी महाराजांच्या भूमिकेत हुबेहूब उठून दिसायचे.
चित्रपट सृष्टीबरोबरच त्यांनी रंगभूमीही गाजवली. पाच ऐतिहासिक, वीस ग्रामीण, अकरा सामाजिक नाटकांमधून त्यांनी अभिनय साकारला. सिनेमा आणि नाटकाबरोबर त्यांना लेखनाची ही आवड होती. त्यांनी ‘धाकटी पाती‘ हे पुस्तक लिहिले, ज्याला राज्य शासनाचे पारितोषिक मिळाले. ‘कोल्हापुरी साज'', ‘विश्‍वकर्मा’ ही पुस्तके त्यांनी लिहिली आहेत. ते एक उत्तम चित्रकार व शिल्पकार होते. त्यांचा पावडर शेडिंगमध्ये हातखंडा होता. त्यांच्या नावाने शिवाजी विद्यापीठात आर्ट गॅलरी व्हावी, अशी मागणी आहे. ती लवकरच पूर्ण होईल, अशी अपेक्षा असल्याचेही मांडरे- पोरे यांनी सांगितले.