महाविकास आघाडीचा
राज्यात मुसंडीचा दावा
मुंबई, ता. १ ः लोकसभा निवडणुकीमध्ये राज्यात महाविकास आघाडीचे २८ तर महायुतीचे २० उमेदवार विजयी होण्याची शक्यता असल्याचा दावा विजयपथ पॉलिटिकल कन्सल्टन्सीने केला आहे. राज्यातील ४८ लोकसभा मतदारसंघातील प्रत्येक मतदारसंघातून किमान १५ ते २० हजार मतदारांचा कल यासाठी त्यांनी जाणून घेतला. निवडणुकीतील स्थानिक बलाबल, पक्षीय समीकरणे, जातीय समीकरणे, प्रचाराचे मुद्दे, स्थानिक प्रश्न व टप्प्याटप्प्याने बदलत गेलेला निवडणुकीचा रंग या सर्व गोष्टींचा अभ्यास करून हा अहवाल बनवण्यात आला आहे. थेट जनतेतून आलेला कल या माध्यमातून सांगण्यात आला आहे. यामध्ये महाविकास आघाडीला २८ तर महायुतीचे २० उमेदवार विजयी होतील, असा यांचा अंदाज आहे.