पोलिस बंदोबस्तात
शाहूपुरीत तालमीचा ताबा
सकाळ वृत्तसेवा
कोल्हापूर, ता. १ ः शाहूपुरी व्यापारी पेठेतील एका तालमीचे व्यवस्थापन मंडळ व अध्यक्ष पदावरून दोन गटांत वाद आहे. याप्रकरणी एका गटाला व्यवस्थापनाचे कामकाज करण्याचे आदेश दिले. मात्र, प्रतिस्पर्धी गट तालमीत येण्यास मज्जाव करीत होता. त्यामुळे पोलिस बंदोबस्तात ताबा घेण्यासाठी गेलेला गट व प्रतिस्पर्धी समोरासमोर आल्याने या परिसरातील वातावरण काहीकाळ तंग होते.
शाहूपुरी व्यापारी पेठेतील प्रसिद्ध जयभवानी शाहूपुरी तालमीतील व्यवस्थापन व अध्यक्षपदावरून मार्गदर्शक व प्रशिक्षकांच्या दोन गटांत वाद आहे. याबद्दल धर्मादाय आयुक्तांकडे हे प्रकरण प्रलंबित होते. त्याचा निकाल एक एप्रिल २०२४ ला एका गटाच्या बाजूने लागला. या आदेशात या गटाला व्यवस्थापन बघण्यास परवानगी देण्यात आली होती. मात्र, समोरील गट या गटाला तालमीत येण्यास मज्जाव करीत होता. अनेक दिवस प्रयत्न करूनही यात यश येत नव्हते. अखेर आज शाहूपुरी पोलिसांत अर्ज देऊन रितसर पोलिस बंदोबस्त घेण्यात आला. त्यांच्या मदतीने या आदेशानुसार तालमीत प्रवेश करण्यासाठी आलेल्या गटाला प्रतिस्पर्धी गटाने जोरदार विरोध दर्शविला. या वादावादीमुळे दुपारी या परिसरात वातावरण तंग बनले होते.