अन्यायकारक पासिंग दंड रद्द करा
सुभाष जाधव : अन्यथा, चक्का जाम आंदोलन करणार
सकाळ वृत्तसेवा
कोल्हापूर, ता. २ : राज्य शासनाच्या परिवहन विभागाचे आयुक्त विवेक भिमनावर यांनी नुकत्याच काढलेल्या आदेशानुसार पासिंग न झालेल्या व्यावसायिक वाहनधारकांवर प्रतिदिन पन्नास रुपयांप्रमाणे दंड आकारणी सुरू झाली आहे. या दंड आकारणीला विविध व्यावसायिक वाहनधारकांच्या संघटनांनी विरोध दर्शविला असून, याबाबत लवकरच जिल्हाधिकारी व प्रादेशिक परिवहन विभागासह मुख्यमंत्र्यांनाही निवेदन देण्यात येणार आहे. त्याची दखल न घेतल्यास चक्का जाम आंदोलन करण्यात येईल, असा इशारा जिल्हा लॉरी ऑॅपरेटर असोसिएशनचे अध्यक्ष सुभाष जाधव यांनी दिला.
ते म्हणाले, ‘राज्यातील व्यावसायिक वाहनधारकांत रिक्षा, टॅक्सी, ट्रक, टेम्पो, टँकर, डंपर, बस अशा वर्गातील पासिंग न झालेल्या वाहनांना प्रतिदिन ५० रुपये दंड लावण्यात येणार आहे. या दंडात्मक कारवाईत २०१६ पासूनची वसुली होणार आहे. ही अन्यायकारक बाब आहे. ही दंडात्मक कारवाई जोपर्यंत रद्द होत नाही तोपर्यंत कोल्हापूरसह राज्यातील सर्व व्यावसायिक वाहनधारकांच्या संघटना टप्प्याटप्प्याने आंदोलन करणार आहेत.’
दरम्यान, ऑल इंडिया मोटर ट्रान्सपोर्ट काँग्रेस, नवी दिल्ली तर्फे दंडात्मक कारवाई रद्द होण्यासाठी लढा उभारला आहे. या लढ्याला येथील शिरोली-नागाव ट्रान्सपोर्ट असोसिएशन अध्यक्ष कुलभूषण कोळी यांनी पाठिंबा दिला. तसेच शिरोली टेम्पो असोसिएशनचे गिरी गोसावी, आदर्श टेम्पो युनियनचे संचालक सुरेश सूर्यवंशी, स्वाभिमानी माल ट्रक वाहतूक संघटनेचे सचिव युवराज पाटील, वाळू वाहतूक संघटनेचे उपाध्यक्ष विजय तेरदाळकर यांनी आंदोलनास पाठींबा दिला. लॉरी ऑपरेटर ही संस्था जिल्ह्याची शिखर संघटना आहे. आम्ही सदैव आमच्या ट्रकसह आंदोलनात सहभागी होणार असल्याचे अध्यक्ष सुभाष जाधव यांनी सांगितले.
उपाध्यक्ष भाऊ घोगळे यांनी प्रास्ताविक केले. यावेळी असोसिएशनचे प्रकाश केसरकर, हेमंत डिसले, शिवाजी चौगुले, विलास पाटील, विजय भोसले, रमेश कनेरकर, राजेश हात्तळी, महादेव माने, उत्तम पसारे, आदी उपस्थित होते. सचिव हेमंत डिसले यांनी आभार मानले.