शिवराज्याभिषेकदिनी
मर्दानी कलेची मानवंदना
मराठा महासंघातर्फे साउंड सिस्टीमविरहित मिरवणूक
सकाळ वृत्तसेवा
कोल्हापूर, ता. २ : मराठा महासंघातर्फे ३५० व्या शिवराज्याभिषेकदिनी (ता. ६) होणाऱ्या राज्याभिषेक मिरवणुकीमध्ये मिरजकर तिकटी येथे छत्रपती शिवाजी महाराजांना जिल्ह्यातील मर्दानी खेळ आखाड्यांतर्फे मर्दानी कलेची मानवंदना देण्यात येणार आहे. या माध्यमातून साउंड सिस्टीमला फाटा देऊन मराठमोळी संस्कृती जपण्याचा संकल्प करण्यात आला आहे.
कोल्हापूर जिल्ह्याने नेहमीच राज्याला दिशा देण्याचे काम केले आहे. याचाच एक भाग म्हणून मिरवणुकींना नवी दिशा देण्यासाठी जिल्ह्यातील सर्व मर्दानी आखाड्यांनी पुढाकार घेतला आहे. शिवराज्याभिषेकदिनी होणारी छत्रपती शिवरायांची मिरवणूक पारंपरिक, शिस्तबद्ध, पर्यावरणपूरक मराठमोळी संस्कृती जपणारी असणार आहे. या मिरवणुकीत मर्दानी आखाड्यांच्या वतीने सर्व खेळाडू छत्रपती शिवाजी महाराजांना मानवंदना देणार आहेत. या मिरवणुकीत साउंड सिस्टीमशिवाय हे कार्यकर्ते तरुण, नागरिक मिरवणुकीत सहभागी होतात, हे दाखवून देणार आहेत. तरी सर्व मर्दानी खेळाच्या आखाड्यांनी ६ जून रोजी सायंकाळी ५.३० वाजता मिरजकर तिकटी, मंगळवार पेठ येथे एकत्र जमावे, असे आवाहन मराठा महासंघ व मर्दानी खेळाच्या आखाडा प्रमुखांनी प्रसिद्धीपत्रकाद्वारे केले आहे.