आजऱ्यातील झाडांची कत्तल थांबवा
समाजसेवक नरसू शिंदे सामाजिक संस्थेची मागणी ः तहसीलदारांना निवेदन
सकाळ वृत्तसेवा
आजरा, ता. ३ ः आजरा, चंदगड व गडहिंग्लज तालुका नैसर्गिकदृष्ट्या संपन्न आहे. आजरा व चंदगड तर डोंगराळ व जंगलानी व्यापलेले आहेत. या तालुक्यामध्ये सध्या सुबाभूळ, निलगिरी या झाडांबरोबर स्थानिक प्रजातीची झाडे तोडली जात आहेत. याला प्रतिबंध करण्याची गरज आहे, अशी मागणी समाजसेवक नरसू शिंदे सामाजिक संस्थेने केली आहे. आजरा तहसीलदारांना याबाबतचे निवेदन दिले आहे.
निवेदनात म्हटले आहे, चार वर्षांपासून वनविभागाच्या एफडीसीएमकडून निलगिरी व सुबाभूळ या झाडांची तोड सुरू आहे. मौजे एमेकोंडजवळ लाकूड डेपो उभारला आहे, पण निलगिरी व सुबाभूळ यांची शासन मान्यतेनुसार तोड सुरू असली तरी स्थानिक प्रजातीची झाडेही यातून तोडली जात असल्याचे निदर्शनास आले आहे. यामुळे पर्यावरणाचा ऱ्हास होत आहे. असाच प्रकार आजऱ्यासह तालुक्यातील जंगल भागात घडत आहे. येथील स्थानिक जातीची झाडेही तोडून पळवली जात आहेत. याबाबत कार्यवाही करण्याची गरज आहे. निवेदनावर समाजसेवक नरसू शिंदे, अमर मटकर, आनंदा सुतार, सुधाकर घोरपडे, शिवाजी भुगुत्रे, भिकाजी गोंधळी यांच्या सह्या आहेत.