विद्यार्थ्यांसाठी मोफत सायको मॅट्रिक टेस्ट
कोल्हापूर, ता. ३ : समिधा प्रतिष्ठान व योगदान फाउंडेशन यांच्या संयुक्त विद्यमाने बारावी उत्तीर्ण झालेल्या विद्यार्थ्यांसाठी त्यांच्या पुढील शैक्षणिक व व्यावसायिक करिअरच्या दृष्टीने मार्गदर्शन करण्यासाठी मोफत "सायको मॅट्रिक टेस्ट" व त्यानंतर त्याबाबतचे समुपदेशन केले जाणार आहे. विद्यार्थ्यांनी योग्य शैक्षणिक उपक्रम निवडणे आणि त्याच्या अनुषंगाने नंतर योग्य व्यवसाय किंवा नोकरी निवडणे हे त्याच्या भवितव्याच्या दृष्टीने अत्यंत महत्त्वाचे असते. अनेक वेळा चुकीचे अभ्यासक्रम निवडल्यामुळे मुलांचे शिक्षण अर्धवट राहते किंवा त्यांना त्यांच्या कुवतीप्रमाणे यश मिळत नाही. यासाठी त्याच्या मानसिकतेच्या दृष्टीने त्याचे मूल्यांकन व्हावे आणि त्याला योग्य अभ्यासक्रम निवडण्यास मदत व्हावी यासाठी विविध प्रकारच्या सायको मॅट्रिक टेस्ट उपलब्ध झाल्या आहेत. शनिवार (ता. ८) ही चाचणी होणार असून, त्यानंतर दोन ते तीन दिवसांनी समुपदेशन होणार आहे. अजित ठाणेकर किंवा विजयसिंह खाडे पाटील यांच्याशी संपर्क साधावा, असे आवाहन केले आहे.