‘आयटीआय’ प्रवेश प्रक्रिया सुरू
सकाळ वृत्तसेवा
कोल्हापूर, ता. ३ : शासकीय आणि खासगी औद्योगिक प्रशिक्षण संस्थेची (आयटीआय) प्रवेश प्रक्रिया आजपासून सुरू झाली. या प्रक्रियेत ऑनलाईन अर्ज करण्याची मुदत ३० जूनपर्यंत आहे.
व्यवसाय शिक्षण व प्रशिक्षण संचालनालयाने निश्चित करून दिल्यानुसार प्रवेश प्रक्रिया राबविली जाणार आहे. यावर्षी आयटीआयमध्ये प्रवेशित होण्यासाठी काही दहावी उत्तीर्ण विद्यार्थ्यांनी ऑनलाईन अर्ज भरण्याच्या प्रक्रियेतील पहिला टप्पा पूर्ण केला. कोल्हापुरातील कळंबा रोडवरील आणि तालुका पातळीवरील आयटीआयमधील प्रवेश अर्ज स्वीकृती आणि माहिती केंद्रामध्ये प्रवेश प्रक्रिया जाणून घेण्यासाठी विद्यार्थी, पालकांनी हजेरी लावली. त्यामुळे आयटीआयचा परिसर गर्दीने गजबजला. विद्यार्थ्यांना प्रवेश प्रक्रियेची माहिती देण्यासाठी शासकीय आणि खासगी आयटीआयमध्ये सकाळी दहा ते अकरा यावेळेत मार्गदर्शन सत्र आयोजित केले आहे.