अन् संजय मंडलिकांनी केंद्रावरून काढता पाय घेतला

सकाळ वृतसेवा
कोल्हापूर, ता. ४ ः सकाळी आठ वाजता सुरू झालेली कोल्हापूर लोकसभा मतदार संघातील मतमोजणीची हुरहूर साधारण दुपारी साडेबारा एक दरम्यान कल स्पष्ट झाल्यावर संपली. पुढे एकतर्फी कॉंग्रेसचे उमेदवार श्रीमंत शाहू छत्रपती महाराज विजयी होणार असल्याचे दिसले आणि विजयी होणार असा आठव्या फेरीपर्यंत दृढ निश्‍चय असलेले महायुतीच्या शिवसेनेचे उमेदवार खासदार संजय मंडलिकांनी काढता पाय घेतला. पुढे मतमोजणी केंद्रातील हुरहूर संपली आणि न्यू पॅलेसवर विजयाचा जल्लोष सुरू झाला.
रमणमळा येथील धान्य गोदामात कोल्हापूर लोकसभा मतदार संघाच्या सहा विधानसभा मतदार संघातील मतमोजणी होती. खुद्द जिल्हाधिकारी अमोल येडगे संपूर्ण केंद्रावर लक्ष ठेवून होते. सकाळी आठ वाजता टपाली मतांचे एकत्रीकरण केले. त्यानंतर एक एक करीत कोल्हापूर उत्तर, कोल्हापूर दक्षिण, कागल, राधानगरी आणि चंदगड विधानसभा मतदार संघातील मोजणी सुरू झाली. साधारण अर्धा-पाऊण तासांत एक फेरी पूर्ण होत होती. येथे प्रत्येक फेरीत श्रीमंत शाहू छत्रपती महाराज आघाडीवर होते. सकाळी दहाच्या सुमारास उमेदवार असलेल्या मंडलिक स्‍वतः मोजणी केंद्रावर आले. त्यांना त्यांच्या विजयाची खात्री होती. पहिल्या सहा फेरी मध्ये महाराज आघाडीवर असतानाही त्यांनी मतमोजणी केंद्रावर अजून भरपूर फेऱ्या आहेत. मला विजयाची खात्री आहे, असे माध्यमांशी बोलताना सांगितले. मात्र, साधारण पुढील दीड-दोन तासांमध्येच त्यांच्या हक्काच्या कागल मतदार संघातील त्यांचे मताधिक्य कमी झाल्याचे त्यांना दिसले. पुढे आशा होती ती चंदगडची. मात्र तेथेही त्यांची मते कमी आल्यानंतर त्यांना पराभवाची जाणीव झाली आणि त्‍यांनी तेथून काढता पाय घेतला.

प्रत्येक फेरीच्या आकडेवारींची जुळवाजुळव
उमेदवारी प्रतिनिधींना प्रशासनाकडून दिलेल्या ओळखपत्राची लेस भगवी होती आणि आघाडीच्या प्रतिनिधींना दिलेल्या ओळखपत्राची लेस काळी होती. त्यामुळे कोण कोणाच्या गटातील आहे ते लेसवरून समजत होते. त्यामुळे कोणत्या गटाचे प्रतिनिधी किती धावपळ आणि प्रत्येक फेरीच्या आकडेवारींची जुळवाजुळव कशी करीत होते हे दिसत होते. काहींनी रायटींग पॅड, वह्या, कॅल्युकेलट सोबत आणले होते.
-----
प्रत्येक प्रतिनिधीच्या हातात स्लिप होत्या. त्यावर गावनिहाय आकडे प्रिटेंड होते. मशिन मधील आकडे ते स्लीपवर भरून शेजारील प्रतिनिधीकडे देत होते. तो प्रतिनिधी सर्वांची जुळवाजुळव करुन बेरीज करीत होता. त्यामुळे कोणत्या केंद्रावर, कोणत्या फेरीत कोणाला किती मते मिळाली याची नोंद त्यांच्याकडे काही क्षणात होत होती. त्यावरूनच ते विजयाचा आणि मताधिक्याचा अंदाज लावत होते. विशेष म्हणजे निवडणूक अधिकाऱ्यांनी शेवटी जाहीर केलेल्या आकडेवारींची आणि प्रतिनिधींच्या आकडेवारीक किरकोळ दोन ते पाच मतांचा फरक दिसत होता.
----------