खासदार धैर्यशील माने यांच्या
घरी दिवसभर आनंदोत्सव
कोल्हापूरः खासदार धैर्यशील माने यांच्या विजयानंतर खुद्द मुख्यमंत्री एकनाथ शिंदे यांनीही मोबाईवरून संवाद साधून त्यांचे अभिनंदन केले. खासदार माने यांना त्यांनी उद्या (६) मुंबईत बोलवले आहे. दिवसभरात खासदार माने यांनी कणेरी मठावर जाऊन काडसिद्धेश्‍वर स्वामींची भेट घेतली. दिवसभर नेत्यांसह कार्यकर्त्यांनी त्यांच्यावर शुभेच्छांचा वर्षाव केला. यामुळे रुईकर कॉलनीतील त्यांच्या निवासस्थानी आनंदोत्सव सुरूच राहिला.
खासदार माने यांचा आश्‍चर्यकारकरीत्या विजय झाल्यानंतर कालपासून त्यांच्यावर शुभेच्छांचा वर्षाव सुरू आहे. त्यांच्या निवासस्थानाचा परिसर गुलालाने न्हाऊन निघाला आहे. आज सकाळी आठपासूनच ते कार्यकर्ते, अधिकारी, नातेवाईक, मित्रमंडळींच्या शुभेच्छा स्वीकारत होते. त्यांच्या रुईकर कॉलनीतील घराजवळ कार्यकर्त्यांची गर्दी दिवसभर कायम होती. विक्रेते दारातच पुष्पगुच्छ, हार घेऊन उभे होते. कार्यकर्ते मानेंच्या सोबत उभे राहून सेल्‍फीसह छायाचित्रे घेत होते. दुपारी मंत्री, आमदार, पदाधिकाऱ्यांनी सुद्धा भेट घेऊन अभिनंदन करून शुभेच्छा दिल्या. काडसिद्धेश्‍वर स्वामींची भेट घेण्यासाठी गेल्यानंतर सुद्धा कार्यकर्ते थांबून होते. कार्यकर्त्यांच्या गराड्यात असतानाच त्यांना येणारे फोन कॉल सुद्धा ते स्वीकारत होते. येईल त्याचे हसतमुखाने स्वागत करीत होते. गुलालाने ते स्वतः न्हाऊन निघाले होते. त्यांच्या सोबत कुटुंबीयांचेही अभिनंदन होत होते. मुंबईत एनडीए आघाडीची बैठक उद्या दुपारी एक वाजता वर्षा बंगल्यावर आहे. त्यामुळे शुभेच्छांच्या वर्षावातच त्याचीही तयारी सुरू होती. निवासस्थानी होणाऱ्या गर्दीमुळे तेथे आजही पोलिस बंदोबस्तही तैनात ठेवला होता. काही पोलिस, प्रशासनातील अधिकारी सुद्धा मानेंचे पुष्पगुच्छ देऊन अभिनंदन करीत होते. हातकणंगले लोकसभा मतदारसंघातील कोल्हापूर आणि सांगली जिल्ह्यातील कार्यकर्ते, पदाधिकारीसुद्धा शुभेच्‍छांसाठी गाड्या भरून येताना दिसत होते.