इचलकरंजीत बुधवारी
‘मिशन ई-अॅडमिशन’
सकाळ वृत्तसेवा
इचलकरंजी, ता. ९ : येथील पालक-शिक्षक संघातर्फे इंजिनिअरिंगच्या प्रवेश प्रक्रियेसंबंधी ‘मिशन ई-अॅडमिशन’ उपक्रमाचे आयोजन केले आहे. श्रीमंत ना. बा. घोरपडे नाट्यगृहामध्ये बुधवारी (ता. १२) सकाळी १० ते सायंकाळी ६ या वेळेत हा उपक्रम होणार आहे. यामध्ये १४ इंजिनिअरिंग महाविद्यालयाचा सहभाग राहणार आहे.
दुपारच्या सत्रात प्रवेश प्रक्रिया कशी असेल, इंजिनिअरिंग म्हणजे काय, विविध इंजिनिअरिंग महाविद्यालयांची माहिती, उपलब्ध अभ्यासक्रम यांची माहिती दिली जाणार आहे. प्रा. डॉ. अजित पाटील हे मार्गदर्शन करणार आहेत. प्रवेशप्रक्रियेतील नोंदणीपासून, फी स्ट्रक्चर, फी सवलती, कॉलेजेसचे इनटेक आणि कट ऑफविषयी प्रा. डॉ. अनिलकुमार गुप्ता माहिती देणार आहेत. प्रवेशासाठी महत्त्वाची माहिती आणि अनेक कॉलेजेस आणि शाखांची मागील वर्षाची ‘कट ऑफ’ असलेली पुस्तिका विद्यार्थ्यांना दिली जाणार आहे. इचलकरंजी परिसरातील १४ इंजिनिअरिंग कॉलेजेस सहभागी होऊन त्यांच्याविषयी माहिती देणार आहेत. पालक आणि विद्यार्थ्यांनी लाभ घ्यावा, असे आवाहन प्रा. एच. ए. पाटील, प्रवीण कुरडे यांनी पालक-शिक्षक संघातर्फे केले आहे.