चाफ्याची भाव परिसरात दुर्गंधी
आजरा-महागाव मार्गावर वाहनधारकांना त्रास : मृत जनावरे, कोंबड्यांचा खच
सकाळ वृत्तसेवा
आजरा, ता. ९ : आजरा-महागाव मार्गावर चाफ्याची भाव परिसरात दुर्गंधी पसरली आहे. येथे मृत जनावरे, कोंबड्या, खराब झालेली अंडी, यांसह खराब झालेल्या प्लास्टिकच्या वस्तू व उपकरणे टाकली जात आहे. जनावरे, कोंबड्या कुजल्यामुळे परिसरात दुर्गंधी सुटल्याने या परिसरातून ये-जा करणे अडचणीचे झाले असून, वाहनधारकांना त्रास होत आहे. याबाबत कारवाई करावी, अशी मागणी नागरिक व होनेवाडी ग्रामपंचायतीकडून केली जात आहे.
आजरा-महागाव मार्गावरील ग्रामपंचायत हद्दीनजीक चाफ्याची भाव परिसर येतो. रस्त्याच्या बाजूचा एक भाग खोलगट या बाजूला असल्याने त्याचा फायदा काही जण घेत आहेत. येथे मृत जनावरे, कोंबड्या, खराब झालेली अंडी टाकली जात आहेत. वैद्यकीय कचरा, प्लास्टिकही टाकल्यामुळे हा परिसर कचऱ्याचे आगर झाला आहे. मृत जनावरे व कोंबड्या कुजल्या की, येथे भयंकर दुर्गंधी पसरते. त्यामुळे या मार्गावरून ये-जा करणाऱ्या वाहनधारकांना त्‍याचा त्रास होत आहे.
-------------
तारेच्या कंपाऊंडची मागणी
वनविभाग आजरामार्फत येथे सूचना फलक लावले असले तरी मृत जनावरे, कोंबड्या टाकण्याचे प्रकार कायम आहेत. याबाबत होनेवाडी ग्रामपंचायतीमार्फत वनविभागाकडे तक्रार केली असतानाही दोषींवर कोणतीही कारवाई होत नसल्याचे होनेवाडी ग्रामपंचायतीचे सदस्य कृष्णा पाटील यांनी सांगीतले. असे प्रकार करणाऱ्यांवर वनविभागाकडून दंडात्मक कारवाई व्हावी. तसेच या परिसरात कायमचे तारेचे कंपाऊंड करावे, अशी मागणी ग्रामस्थ व ग्रामपंचायतीकडून केली जात आहे.