५१ तोळे लुबाडणाऱ्या
संशयिताचा गोव्यात शोध
सकाळ वृत्तसेवा
कोल्हापूर, ता. ९ : फोटो व्हायरल करण्याची भीती दाखवून ताराबाई पार्कातील अल्पवयीन मुलीकडून ५१ तोळे सोन्याचे दागिने लुबाडणाऱ्या बनीदासचा गोव्यात शोध सुरू करण्यात आला आहे. शाहूपुरी पोलिसांचे पथक त्याच्या मागावर असून, तो तिथून पसार झाल्याची शक्यता आहे. रात्री उशिरा पोलिसांच्या पथकाने गोव्यातील शोध थांबवला.
ताराबाई पार्कातील व्यापाऱ्याच्या मुलीला इन्स्टाग्रामच्या माध्यमातून प्रेमाच्या जाळ्यात ओढणाऱ्या परप्रांतीय भामट्याने तिची कोल्हापुरात येऊन भेट घेतली होती. तिच्या सोबतचे फोटो एडिट करून त्या आधारे ब्लॅकमेल करत घरातील २६ लाखांचे दागिने लुबाडून घेतले होते. शाहूपुरी पोलिसांनी त्याचा माग काढण्यास सुरुवात केल्यानंतर तो गोव्यात असल्याची माहिती पुढे आली होती. यामुळे पोलिस तातडीने गोव्याला रवाना झाले. गोव्यातील त्याच्या एका नातेवाइकाकडे पोहोचून पोलिसांची चौकशी केली, परंतु तो तिथून पसार झाला होता. पोलिसांना त्याची इतर माहिती मिळविण्यात यश आले असल्याने त्याला लवकरच बेड्या ठोकू, असा विश्वास पोलिस निरीक्षकांनी बोलून दाखवला.