नंबर प्लेट बदलून विकलेल्या
आणखी तीन टेम्पो ट्रॅव्हलर जप्त

स्थानिक गुन्हे अन्वेषण शाखेकडून कारवाई

सकाळ वृत्तसेवा
कोल्हापूर, ता. १० : टेम्पो ट्रॅव्हलरचे चेस नंबर आणि नंबर प्लेट बदलून ती रस्त्यावर फिरविणाऱ्या, तसेच त्यांची बेकायदेशीररीत्या विक्री करणाऱ्या टोळीचा पोलिसांनी यापूर्वीच पर्दाफाश केला आहे. त्यांच्याकडून आणखी तीन टेम्पो ट्रॅव्हलर स्थानिक गुन्हे अन्वेषण शाखेच्या पथकाने जप्त केल्या आहेत. या वाहनांना प्रादेशिक परिवहन कार्यालयातून तपासणी न करताच फिटनेस सर्टिफिकेट देण्यात येत आहे. ती कोणी दिली? याची माहिती मिळवण्यासाठी पोलिसांनी प्रादेशिक परिवहन कार्यालयाशी पत्रव्यवहार केला आहे. ती मिळाल्यानंतर लवकरच याचा उलगडा होईल, अशी माहिती स्थानिक गुन्हे अन्वेषण शाखेचे पोलिस उपनिरीक्षक शेष मोरे यांनी दिली.
टेम्पो ट्रॅव्हलरना दरवर्षी एक लाख २० हजार रुपये कर भरावा लागतो. तसेच दरवर्षी नोंदणी नूतनीकरण करून फिटनेस सर्टिफिकेट घ्यावे लागते. यासाठी होणारा खर्च टाळण्यासाठी प्रादेशिक परिवहन कार्यालयातील एका एजंटसह काही टेम्पो ट्रॅव्हलर मालक आणि मेकॅनिकलनी बंद अवस्थेतील टेम्पो ट्रॅव्हलरची नंबरप्लेट आणि चेस नंबर वापरून कर बुडवत शासनाची फसवणूक केली. स्थानिक गुन्हे अन्वेषण शाखेने हा प्रकार उघडकीस आणून सहा ट्रॅव्हलर जप्त केल्या होत्या. या गुन्ह्याचा कसून तपास सुरू असताना आणखी तीन ट्रॅव्हलर पोलिसांनी जप्त केल्या. प्रादेशिक परिवहन कार्यालयाकडून प्रवासी टेम्पो ट्रॅव्हलरचे नूतनीकरण करताना वाहनाचा इंजिन नंबर, चेस नंबर आणि नोंदणी नंबरची तपासणी करणे बंधनकारक असते; मात्र त्याकडे दुर्लक्ष करून अधिकाऱ्यांनी वाहनांना फिटनेस सर्टिफेकिट दिले आहे. या वाहनांना सर्टिफिकेट कोणी दिले, याचा शोध घेण्याचे काम सुरू आहे, असे तपास अधिकारी मोरे यांनी सांगितले.