शहरात ९० कर्णकर्कश बुलेट सायलेन्सर जप्त
शहर वाहतूक पोलिस शाखेची कारवाई; दारू पिऊन दुचाकी चालविणाऱ्यांवही बडगा

सकाळ वृत्तसेवा
कोल्हापूर, ता. १० : शहरात ध्वनिप्रदूषण करणाऱ्या जवळपास ९० कर्णकर्कश बुलेट सायलेन्सर जप्त करण्याची कारवाई करण्यात आली. त्यांच्याकडून सुमारे ९० हजार रुपये दंड वसूल करण्यात आला. त्याचबरोबर दारू पिऊन दुचाकी चालविणाऱ्या ६० जणांवर कारवाई करत खटले दाखल करण्यात आले. शहर वाहतूक पोलिस शाखेकडून तीन दिवसांत मोहीम राबवून धडक कारवाई केली आहे.
पोलिसांकडून दारू पिऊन वाहन चालविणाऱ्यांसह कर्णकर्कश बुलेट सायलेन्सरवर कारवाईची मोहीम सुरू केली आहे. यासाठी पोलिस उपननिरीक्षक डॉ. मनोज पाटील यांच्या नेतृत्वाखाली शहरात सहा पथके स्थापन केली आहेत. प्रत्येक पथकात दोन जणांचा समावेश आहे. या पथकांकडून शहरात सर्वत्र कारवाई करण्यात येत आहे. यामध्ये शहरातील ९० बुलेटचालकांवर कारवाई करून कर्णकर्कश सायलेन्सर जप्त केले. त्यांच्याकडून प्रत्येकी १ हजार रुपये दंड वसूल केला. ही कारवाई इथून पुढेही काही दिवस सुरू राहणार आहे.

कोट
दारू पिऊन वाहन चालविणे हे अपघाताला निमंत्रण देण्यासारखेच आहे. त्यांच्याबरोबरच दुसऱ्याच्या जीवाला धोकादायक आहे. त्याचबरोबर कर्णकर्कश सायलेन्सरच्या आवाजाने मोठ्या प्रमाणत ध्वनिप्रदूषण होत आहे. या पार्श्‍वभूमीव मोहीम सुरू केली आहे.
-डॉ. मनोज पाटील, उपनिरीक्षक, शहर पोलिस वाहतूक शाखा