अल्पवयीन मुलीवर अत्याचार;
एकाला तीन वर्षे सक्तमजुरी

कोल्हापूर, ता. १० : दोन वर्षांपूर्वी अल्पवयीन मुलीवर अत्याचार केल्याप्रकरणी एका विधी संघर्षग्रस्त बालकास जिल्हा व सत्र न्यायाधीश (१) पी. एफ. सय्यद यांनी तीन वर्षे सक्तमजुरी व १५ हजार रुपये दंडाची शिक्षा सुनावली. या खटल्यात विशेष सरकारी वकील ॲड. अमिता कुलकर्णी यांनी काम पाहिले. दंडाची रक्कम पीडितेस नुकसानभरपाई म्हणून देण्याचे आदेशही दिले आहेत.
फिर्यादीचे पंक्चर व सर्व्हिस सेंटर आहे. येथे चार स्वमग्न मुले कामास आहेत. येथे एक विधी संघर्षग्रस्त बालक त्याच्या वडिलाच्या सांगण्यावरून शिकण्यासाठी जात होता. १ जून २०२२ ला दुपारी चार वाजता फिर्यादी हे वाहनाच्या चाकाचे पंक्चर काढत होते. तेव्हा संशयित विधी संघर्षग्रस्त बालक दिसेनासा झाला. त्यावेळी तो पाठीमागील पडक्या खोलीत अल्पवयीन मुलीसोबत अश्लील कृत्य करीत असल्याचे फिर्यादीने पाहिले. त्यांनी तत्काळ मुलीस त्याच्या तावडीतून सोडविले. त्यावेळी संशयित तेथून पळून जाण्यात यशस्वी झाला. याप्रकरणी फिर्यादी यांनी जुना राजवाडा पोलिस ठाण्यात तक्रार दाखल केली होती. या प्रकरणाचा तत्कालीन परिविक्षाधिन पोलिस उपनिरीक्षक पी. एस. वाकळे यांनी तपास करून न्यायालयात दोषारोपपत्र दाखल केले होते.