chd21.jpg
94182
मुंबई ः मुख्यमंत्री एकनाथ शिंदे यांना निवेदन देताना शिवाजीराव पाटील.
-----------------------
चंदगड इंडस्ट्रीज झोनप्रश्नी मुख्यमंत्र्यांना निवेदन
शिवाजीराव पाटील; रहिवासी झोन कायम करण्याची मागणी

चंदगड, ता. ३ ः येथील नगरपंचायत हद्दीतील प्रथमेशनगरचा परिसर शासनाने इंडस्ट्रीज झोन म्हणून राखीव ठेवला आहे, मात्र तीस वर्षांपासून या विभागात नागरी वस्ती असल्याने ही अट रद्द करून हा परिसर रहिवासी झोन म्हणून कायम करावा, अशी मागणी भाजपचे चंदगड विधानसभा मतदारसंघ निवडणूकप्रमुख शिवाजीराव पाटील यांनी केली आहे. इंडस्ट्री झोन हटाव कृती समितीच्या पदाधिकाऱ्यांसह त्यांनी मुख्यमंत्री एकनाथ शिंदे यांची भेट घेऊन या प्रश्नाकडे लक्ष वेधले.
शहराच्या उत्तरेला बेळगाव-वेंगुर्ला मार्गाला संलग्न या परिसरात तीस वर्षांपासून नागरी वस्ती आहे. वाढती लोकसंख्या आणि विभक्त कुटुंब पद्धती यामुळे नागरिकांनी शहरापासून दूर असलेल्या प्रथमेशनगरमध्ये जागा खरेदी करून घरे बांधली आहेत. यामध्ये शेतकरी, गवंडी, पंक्चरवाला, गाडी दुरुस्ती करणारे कारागीर अशा सर्वसामान्यांचा समावेश आहे. शहरातील बिगरशेती प्लॉट घेणे आणि नंतर घर उभारणे त्यांना आर्थिकदृष्ट्या परवडत नाही. अनेकांनी लाखो रुपये खर्चून घरे बांधली आहेत. शेतीही केली जाते. असे असताना हा परिसर इंडस्ट्री झोन म्हणून राखीव केल्यास अनेकांची अडचण होणार आहे. प्रथमेशनगर हा भाग उंचावर असून, तेथे लोकवस्ती वाढण्यासाठी अनुकूल आहे. या सर्व बाबींचा विचार करून शासनाने इंडस्ट्री झोन रद्द करून तो रहिवासी झोन म्हणून कायम करावा, अशी मागणी केली आहे. मुख्यमंत्र्यांनी याप्रकरणी सकारात्मक भूमिका घेतल्याचे पाटील यांनी सांगितले. या वेळी इंडस्ट्री झोन हटाव कृती समितीचे अध्यक्ष रणजित गावडे यांच्यासह पदाधिकारी उपस्थित होते.