...अखेर ‘सीपीआर’ला
मिळणार एमआरआय मशीन
मंत्री मुश्रीफ यांचा पाठपुरावा; २६ कोटींचे अनुदान मंजूर
सकाळ वृत्तसेवा
कोल्हापूर, ता. ३ : सीपीआर रुग्णालयात उपचाराला येणाऱ्या दुर्बल घटकांतील रुग्णांना ‘एम. आर. आय.’ चाचणीअभावी उपचार सेवेतील अडचणींचा सामना करावा लागत होता. ही गैरसोय विचारात घेऊन दैनिक ‘सकाळ’मधून ‘सीपीआर’मध्ये एम. आर. आय. सुविधा हाोण्यासाठी वृत्त प्रसिध्द केले होते. याची दखल घेत वैद्यकीय शिक्षणमंत्री हसन मुश्रीफ यांनी केलेल्या निर्णायक पाठपुराव्यानंतर आज सीपीआरला ‘एमआरआय’ खरेदीसाठी २६ कोटींचे अनुदान मंजूर झाल्याचे पत्र आले. त्यामुळे ‘सीपीआर’मध्ये असुविधेंमुळे होणारे रुग्णांचे दुर्लक्ष थांबण्यास आता मदत होणार आहे.
वैद्यकीय शिक्षण मंत्रिपद मिळाल्यानंतर पहिल्याच पत्रकार परिषदेत मंत्री मुश्रीफ यांना ‘सीपीआर’मधील एम. आर. आय. सुविधांचा अभाव याविषयी विचारणा केली होती. त्यानंतर एम. आर. आयची आठवण देणाऱ्या बातम्या वेळोवेळी प्रसिध्द केल्या. त्यानंतर सरकारचा कार्यकाल पूर्ण होत आला तरीही एम. आर. आय. सुविधा झालेली नाही, याबाबत दैनिक ‘सकाळ’मधून वृत्ताद्वारे लक्ष वेधण्यात आले होते.
याची वैद्यकीय शिक्षण खात्याने तातडीने दखल घेतली त्यानंतर मंत्रालयीन पातळीवर पाठपुरावा झाला. अखेर आज सीपीआरला एम. आर. आय खरेदीसाठी २६ कोटी रुपयाचे अनुदान मंजूर झाल्याचे पत्र आले.
या पत्रातील आदेशात सीपीआरला एम. आर. आय मशीन खरेदीसाठी २६ कोटींचे अनुदान मंजूर करण्यात येत आहे. यात सर्व करासह खर्च टर्न की तत्त्वावर खर्च अपेक्षित धरला आहे. या अनुदानास प्रशासकीय मान्यता देताना यंत्र खरेदीचा दर हा अंदाजित आहे. या यंत्रसामग्रीसाठी नवीन पद भरती किंवा निर्मितीची आवश्यकता नसावी, असे म्हटले आहे. हे पत्र आज दुपारी शासकीय वैद्यकीय महाविद्यालयास मिळाले.
-----------------------
कोट
‘सीपीआर’ला एम. आर. आय. मशीन घेण्यासाठी २६ कोटींचे अनुदान मंजूर झाल्याचे पत्र मिळाले आहे. यापुढे ई-निविदा प्रक्रिया होईल. त्यानंतर ज्या कंपनीला मशीन पुरवठा करण्याचा ठेका मिळेल त्यांच्याकडून ते मशीन बसविले जाईल. या सर्वासाठी प्रशासकीय व तांत्रिक प्रक्रिया पूर्ण होण्यासाठी अंदाजे तीन-चार महिन्यांचा कालावधी लागेल.
- डॉ. सत्यवान मोरे, अधिष्ठाता, राजर्षी शाहू महाराज शासकीय वैद्यकीय महाविद्यालय