शहरातील कचरा उठाव ठप्प
झूम प्रकल्पाजवळ रस्ता खचला; चार तास टिप्पर अडकले
सकाळ वृत्तसेवा
कोल्हापूर, ता. २ : लाईन बाजार येथील महापालिकेच्या झूम प्रकल्पातील कचरा नेण्यासाठी मंगळवारी वर्कशॉप विभागाकडून जेसीबी उपलब्ध नसल्याने परिसरात कचऱ्याचे ढीग साचले. तसेच येथील रस्ता खचल्याने सकाळी टिप्परमधील कचरा टाकण्यास अडथळा निर्माण झाला. त्यामुळे चार ते पाच तास या ठिकाणी टिप्पर अडकून पडल्या. परिणामी शहरातील उठाव ठप्प होऊन नागरिकांची गैरसोय झाली.
महापालिकेकडून शहरात टिप्परच्या माध्यमातून नागरिकांच्या थेट घरातून कचरा गोळा केला जातो. त्यानंतर हा कचरा लाईन बाजार येथील झूम प्रकल्प येथे नेऊन टाकला जातो. मंगळवारी झूम प्रकल्पाच्या ठिकाणी रस्त्यावरच पडलेला कचरा हटविण्यासाठी वर्कशॉप विभागाकडून जेसीबी उपलब्ध झाला नाही. त्यामुळे कचऱ्याचे ढीग जसेच्या तसे राहिले. त्याच दरम्यान प्रकल्पाकडे जाणार रस्ता ही पावसामुळे खचला. त्यामुळे या ठिकाणी कचरा टाकायला येणाऱ्या टिप्पर रस्त्यावरच अडकून पडल्या. तब्बल चार ते पाच तास त्या रस्त्यावरच थांबून राहिल्या.
-------------
चौकट
टिप्परची एकच फेरी
दरम्यान, दुपारनंतर हळूहळू टिप्परद्वारे कचरा टाकण्यास सुरुवात झाली. याला खूप उशीर झाल्याने टिप्परची दुसरी फेरी होऊ शकली नाही. त्यामुळे मंगळवारी अनेक ठिकाणी टिप्पर न आल्याने कचरा उठाव ठप्प झाल्याचे चित्र पाहायला मिळाले.