शिवाजी विद्यापीठ राबविणार
व्यापक वृक्षारोपण मोहीम
‘एनएसएस’चे अकरा हजार स्वयंसेवक सहभागी होणार

सकाळ वृत्तसेवा
कोल्हापूर, ता. ३ ः शिवाजी विद्यापीठातर्फे जिल्ह्यात व्यापक वृक्षारोपण मोहीम जुलैमध्ये राबविण्यात येणार आहे. विद्यार्थ्यांमध्ये पर्यावरणाविषयी जाणीव आणि जागृती निर्माण करून सामाजिक बांधिलकी जोपासण्यासाठी विद्यापीठाच्या राष्ट्रीय सेवा योजना विभागाच्या (एनएसएस) सहकार्याने चार लाख २३ हजार २८५ रोपांची लागवड केली जाणार आहे. या मोहिमेमध्ये ‘एनएसएस’चे अकरा हजार स्वयंसेवक सहभागी होणार आहेत.
विद्यापीठाचा एनएसएस विभाग, जिल्हा प्रशासन आणि वनविभागाच्या संयुक्त विद्यमाने राबविण्यात येणाऱ्या या मोहिमेंतर्गत शासनातर्फे गायरान, पडिक जमीन तसेच शासनाच्या अखत्यारीत असणारी इतर वृक्ष लागवड योग्य जमिनीवर वृक्षारोपणाचे नियोजन करण्यात आले आहे. याअंतर्गत लावण्यात येणारी सर्व रोपे ही देशी वाण या प्रजातीच्या असणार आहेत. त्यामध्ये आंबा, जांभूळ, वड, पिंपळ, लिंब, करंज, हिरडा, बेरडा, चिंच, कडुलिंब, बाभूळ, पळस, भोकर, आवळा, साग, ऐन, अर्जुन व इतर स्वदेशी वाणांचा समावेश आहे. शासनाच्या वनधोरणास अनुसरून परिसरनिहाय वृक्षारोपण केले जाणार आहे. विद्यार्थ्यांमध्ये पर्यावरणाबद्दल जागृती निर्माण व्हावी. त्यांच्या रहिवासी क्षेत्राजवळ वृक्षारोपण होत असल्यामुळे त्या वृक्षांची काळजीपण हे विद्यार्थी घेतील, अशी अपेक्षा असल्याची माहिती एनएसएस विभागप्रमुख तानाजी चौगुले यांनी दिली. शिवाजी विद्यापीठ एन. एस. एस. विभाग, महाराष्ट्र शासन, जिल्हाधिकारी कार्यालय, वनविभाग यांच्या संयुक्त विद्यमाने हा उपक्रम होत आहे.
...
कोट
‘प्रशासनातर्फे सर्व ठिकाणी खड्डे काढून तसेच रोपवाटिकांमधून आवश्यक ती सर्व रोपे या मोहिमेत उपलब्ध करून देण्यात येणार आहेत. विद्यार्थ्यांमध्ये पर्यावरण बदल, शाश्वत विकास याची दृष्टी निर्माण व्हावी, असा या उपक्रमाचा उद्देश आहे.
- सिद्धार्थ शिंदे, व्यवस्थापन सदस्य