कोट्यवधींचा निधी, पण विकासकामे कुठे?
वेळखाऊ प्रक्रियेने गती संथ ः खोदलेल्या रस्त्यांची स्थिती वाईट

कोल्हापूर, ता. ५ ः गॅस पाईपलाईनची वा पाण्याच्या लाईनची खोदाई झाल्यानंतर पाठोपाठ पॅचवर्क होत नाही. बहुमजली कार पार्किंग, रंकाळा संवर्धन, पादचारी पूल, फुटबॉल स्ट्रीट, हेरिटेज मार्गावरील वीजदिवे अशा कामांची गती संथ आहे. रस्ते प्रकल्पातील गटारींच्या कामांना मुहूर्त मिळालेला नाही. कामांबाबत घेतल्या जाणाऱ्या बैठकांत महापालिका प्रशासनाकडून आश्‍वासने दिली जातात. पण, त्यानंतरही फरक पडत नसल्याने विकासकामांसाठी कोट्यवधींचा निधी, पण कामे कुठे, अशी स्थिती शहरात होत आहे.
खड्डेमय रस्ते, पार्किंगचा पत्ता नसल्याने वाहतुकीची कोंडी, प्राथमिक सुविधांचा अभाव, केवळ नावालाच असलेली उद्याने अशा प्रकारांमुळे शहराच्या विकासाबाबत पर्यटकांकडून वाईट चर्चा होते. त्यामध्ये रस्त्यांवर विविध कामांसाठी खोदाई झाल्यानंतर त्याकडे महापालिकेचे लक्ष आहे की नाही, अशी स्थिती ठिकठिकाणी दिसते. अनेक ठिकाणी पाईपलाईन व गॅसच्या लाईनसाठी खोदाई झाली आहे. पण, त्यावर पॅचवर्क झालेले नाही. खोदाई झाल्यानंतर पॅचवर्क करण्याची जबाबदारी अनेक कामात असते. ती नसेल तर ठेकेदाराकडून पैसे भरून परवानगी दिली जाते. मग त्या ठेकेदाराकडून काम करून घेण्यात महापालिकेच्या अधिकाऱ्यांच्या काय त्रास होतो हे गणित समजत नाही. जर पैसे भरून घेतले असतील तर त्याप्रमाणे तातडीने खोदाई का बुजवून घेतली जात नाही? हाही प्रश्‍न आहे. याकडे होत असलेल्या कानाडोळ्याने बुजवलेल्या कामाच्या ठिकाणी चिखल, तर काही ठिकाणी खोदलेली डांबर-खडी पडलेली आहे. यामुळे आधीच अरूंद रस्त्यावरील जागा कमी झाली आहे. शंभर कोटी निधीतून केल्या जात असलेल्या रस्त्यांच्या कामातील गटारीच्या कामांना मुहूर्त मिळालेला नाही. पाच अर्धवट झालेल्या रस्त्यांवर पावसात गटारी केल्या जाणार असल्याचे गेल्या महिन्यात सांगितले होते. त्याबाबत कुणी विचारणा करते की नाही? हेच समजत नाही.
याबरोबरच तीर्थक्षेत्र विकास आराखड्यातील पार्किंग, राज्य शासनाच्या पर्यटन विकास निधीतून सुरू असलेले रंकाळा संवर्धन, हेरिटेज मार्गावरील वीजदिवे, फुटबॉल स्ट्रीट अशा कामांची गती जाणवतच नाही. विविध टप्प्यांवर ती कामे रखडतच सुरू असल्याचे दिसते. काही ठिकाणी अर्धवट पडली आहेत, तर काही ठिकाणी पुढील टप्प्यांच्या कामासाठी रेंगाळली आहेत. जिल्हा नियोजन मंडळातून मंजूर झालेल्या निधीतून परीख पुलाजवळील पादचारी पुलाचे काम सुरूच झालेले नाही. त्याबाबतच्या आराखड्यात इतका वेळ गेला आहे.
...
काम करायचे की नाही?
रमणमळा येथील तलावाबाबत प्रशासनाला निर्णय घेता आलेला नाही. हेरिटेज यादीत असलेल्या तलावाचे संगोपन महत्त्वाचे असून, त्याऐवजी तो भाड्याने देण्याबाबतचा विचार केला जात आहे. गोकुळ हॉटेलजवळील आधुनिक पार्किंग सुविधेची गाडीही पुढे सरकत नाही. यातून प्रशासनाला काम करायचे नाही किंवा ते होऊ नये म्हणून कोणाचा दबाव असावा, या दोनच शक्यता दिसतात.