95532
...
पारंपरिक कुदळ मारण्याच्या
विधीने मोहरमला प्रारंभ

नाल्याहैदर पंजाची आज होणार प्रतिष्ठापना
सकाळ वृत्तसेवा
कोल्हापूर, ता. ७ : मोहरमनिमित्त आज बाबूजमाल दर्ग्यासह विविध ठिकाणी कुदळ मारण्याचा पारंपरिक विधी झाला. भर पावसात पारंपरिक वाद्यांच्या गजरात हा विधी झाला. उद्या (सोमवार) रात्री येथे मानाच्या नाल्याहैदर पंजाची प्रतिष्ठापना होणार असून त्यानंतर सर्वत्र पंजे प्रतिष्ठापनेला प्रारंभ होईल. दरम्यान, उद-धुपाबरोबरच पंजांसाठीच्या फेट्यांची बाजारपेठ सजली आहे.
मोहरमचा सण दहा दिवसांचा असून पहिल्या पाच दिवसांत सर्वत्र विधिवत पंजे प्रतिष्ठापना होईल. त्यानंतर सर्वत्र पंजेभेटीच्या सोहळ्यांना प्रारंभ होणार असून शहरासह जिल्ह्यातील विविध भागातही यंदा जय्यत तयारी पूर्ण झाली आहे. शहरातील तालमींतही पंजांची पारंपरिक पद्धतीने प्रतिष्ठापना होणार असून या तालमींसह दर्गा आणि पंजे प्रतिष्ठापना होणारा परिसर विद्युत रोषणाईने सजला आहे. यंदा भर मोहरम उत्सवातच पावसाचा जोर कायम राहण्याची शक्यता आहे. त्यामुळे सर्व ठिकाणी आवश्यक खबरदारी घेतली आहे.