जिल्ह्यातील भूस्खलनाचा धोका टाळण्यासाठी कोणती कार्यवाही केली
आमदार सतेज पाटील यांचा सवाल
कोल्हापूर, ता. ९ : जिल्ह्यातील भूस्खलनाचा धोका असलेल्या ८८ गावांमध्ये नागरिकांच्या सुरक्षिततेसाठी शासनाने कोणती कार्यवाही केली, असा सवाल आमदार सतेज पाटील यांनी विधान परिषदेत केला. याला मदत व पुनवर्सनमंत्री अनिल पाटील यांनी मानवी वस्तीजवळ असणाऱ्या १३ भूस्खलन ठिकाणांवर पहिल्या टप्प्यात भूस्खलन सौम्यीकरण कामासाठी ८३ कोटी १५ लाख रुपयांचा प्रस्ताव कोल्हापूर जिल्हा प्रशासनाने दिला असून, त्या प्रस्तावावर कार्यवाही करण्यात येत असल्याचे लेखी उत्तरात स्पष्ट केले.

आमदार सतेज पाटील यांनी तारांकित प्रश्नाद्वारे भूस्खलग्रस्त गावातील ग्रामस्थांच्या सुरक्षेचा प्रश्न उपस्थित केला. राज्य शासनाच्या आपत्ती व्यवस्थापन विभागाने केलेल्या सर्व्हेनुसार कोल्हापूर जिल्ह्यातील ८८ गावांना भूस्खलनाचा धोका असल्याचे निदर्शनास आले आहे. या गावातील नागरिकांची जीवितहानी टाळण्यासाठी तसेच त्यांच्या स्थलांतरणासाठी कोणती कार्यवाही केली, असा सवाल आमदार पाटील यांनी उपस्थित केला.
यावर दिलेल्या लेखी उत्तरात मदत आणि पुनर्वसनमंत्री अनिल पाटील यांनी सांगितले की, जिल्हाधिकारी यांनी अहवाल दिला आहे. या गावांना प्रत्यक्ष भेट देऊन भूस्खलनाबाबतची माहिती घेतली आहे. यातील १३ ठिकाणे मानवी वस्तीपासून जवळ असल्याचे दिसून आले आहे. या सर्व ठिकाणी पावसाळ्यापूर्वी भूस्खलनाबाबत जनजागृती केली आहे. भारतीय भूवैज्ञानिक सर्वेक्षण विभागाला याबाबत पुन्हा एकदा सर्व्‍हे करून तांत्रिक अहवाल देण्याच्या सूचना दिल्या आहेत. अतिवृष्टीचा इशारा प्राप्त होताच या कुटुंबांना सुरक्षित निवारा केंद्रामध्ये स्थलांतरित करण्याचे नियोजन केले आहे.