पोलिस भरतीची लेखी परीक्षा शनिवारी
विवेकानंद महाविद्यालयात व्यवस्था ः पोलिस चालक पदाची चाचणी समाप्त

सकाळ वृत्तसेवा
कोल्हापूर, ता. ९ ः जिल्हा पोलिस दलात भरती प्रक्रियेतील चालकपदाची चाचणी मंगळवारी समाप्त झाली. १९ ते २८ जून कालावधीत घेतलेल्या मैदानी चाचणीतील पात्र उमेदवारांची लेखी परीक्षा १३ जुलैला दुपारी ३ वाजता ताराबाई पार्कातील स्वामी विवेकानंद महाविद्यालयात होणार आहे. भरतीसाठी आलेल्या १२ हजार उमेदवारांतून १४९६ जण परीक्षेला पात्र ठरले आहेत.
जिल्हा पोलिस दलात पोलिस शिपाई पदाच्या १५४ आणि चालक पदाच्या ५९ अशा २१३ रिक्त जागा भरण्यात येणार आहेत. या भरतीसाठी ११ हजार ४४५ उमेदवारांनी अर्ज भरले होते. १९ जूनपासून पोलिस कवायत मैदानावर धावणे, गोळाफेक, कागदपत्र पडताळणी करून शारीरिक चाचणी पूर्ण करण्यात आली, तर ३ ते ९ जुलै कालावधीत चालक पदासाठीची चाचणी घेतली.
परीक्षार्थींना लेखी परीक्षेसाठीचे हॉल तिकीट वितरण सुरू केले आहे. तरी उमेदवारांनी वेळेवर उपस्थित राहण्याचे आवाहन पोलिस निरीक्षक महेंद्र पंडित यांनी केले आहे.