अकरावी प्रवेशाची
तिसरी निवड
यादी आज

कोल्हापूर : शहरातील विविध २९ कनिष्ठ महाविद्यालयांतील इयत्ता अकरावीच्या विज्ञान आणि वाणिज्य इंग्रजी माध्यमाच्या प्रवेशासाठीची तिसऱ्या फेरीची निवड यादी उद्या, गुरुवारी सकाळी दहा वाजता प्रसिद्ध होणार आहे. त्यामध्ये निवड झालेल्या विद्यार्थ्यांनी शुक्रवार (ता. १२) पर्यंत प्रत्यक्ष प्रवेशाची कार्यवाही पूर्ण करावयाची आहे.
प्रवेशाच्या तिसऱ्या फेरीसाठी ऑनलाईन अर्ज दाखल करण्याची प्रक्रिया ६ ते ८ जुलै दरम्यान राबविली. त्यात एकूण ३६७ विद्यार्थ्यांनी अर्ज भरले आहेत. त्यात विज्ञान विद्याशाखेचे २९९, तर वाणिज्य इंग्रजी माध्यमाचे ६८ विद्यार्थी आहेत. या विद्यार्थ्यांनी दाखल केलेल्या अर्जांच्या छाननीची प्रक्रिया मंगळवारी आणि आज राबविली. त्यानंतर निवड यादी गुरुवारी कोल्हापूर विभागीय शिक्षण उपसंचालक कार्यालयाच्या संकेतस्थळावर प्रसिद्ध होणार आहे. त्यामध्ये निवड झालेल्या विद्यार्थ्यांना त्यांना मिळालेल्या महाविद्यालयांच्या नावाचा ‘एसएमएस’ केंद्रीय प्रवेश प्रक्रिया समितीतर्फे पाठविला जाणार आहे.