प्रीपेड मीटर्स न लावण्याची
कार्यवाही करा : होगाडे
सकाळ वृत्तसेवा
इचलकरंजी, ता. ११ : सामान्य ग्राहकांना प्रीपेड मीटर्स लावणार नाही, असे ऊर्जामंत्री देवेंद्र फडणवीस यांनी आश्‍वासन दिले आहे. पण, केवळ आश्‍वासन नको, अंमलबजावणी करावी, अशी मागणी समाजवादी पक्षाचे प्रदेश कार्याध्यक्ष तथा महाराष्ट्र वीज ग्राहक संघटनेचे अध्यक्ष प्रताप होगाडे यांनी पत्रकार परिषदेत केली.
ऊर्जामंत्री फडणवीस यांनी विधानसभेत व विधान परिषदेमध्ये महाराष्ट्रामधील सर्वसामान्य घरगुती व ३०० युनिटपेक्षा कमी वीज वापरणारे ग्राहक यांना प्रीपेड मीटर्स लावण्यात येणार नाहीत, अशी घोषणा केली आहे. अशीच घोषणा त्यांनी यापूर्वी भाजपा पदाधिकारी बैठकीत केली होती. मात्र, आजअखेर यासंदर्भात अधिकृत निर्णय झालेला नाही. राज्य सरकारने अथवा महावितरण कंपनीने सदरच्या निविदा रद्द करण्याचा अधिकृत निर्णय घेतला आहे, अशी कोणतीही अधिकृत माहिती अद्याप राज्य सरकारने अथवा महावितरणने जाहीर केलेली नाही. त्यामुळे केवळ निवडणुका समोर आहेत म्हणून अशी वक्तव्ये होत आहेत की काय, असा संभ्रम निर्माण झाला आहे. हा संभ्रम दूर करण्यासाठी फडणवीस यांनी त्वरित घोषणेची अधिकृतरीत्या अंमलबजावणी करावी. त्यासाठी महावितरण कंपनीस आदेश द्यावेत अथवा राज्य सरकारमार्फत शासन निर्णय करावा, अशी मागणी केली.
----------
दोन कोटी मिटरची ऑर्डर कशासाठी?
सद्य:स्थितीत प्रीपेड मीटर फक्त सबस्टेशन्स, फीडर्स, ट्रान्सफॉर्मर्स आणि सरकारी कार्यालये येथे लावली जातील, असे ऊर्जामंत्र्यांनी म्हटले आहे. या सर्व ठिकाणी सुमारे पंधरा लाख मीटर लागतील. प्रत्यक्षात मात्र सव्वा दोन कोटी मीटरची ऑर्डर का दिली गेली, याचे कारण उत्तरामध्ये त्यांनी कोठेही दिलेले नाही.