‘खड्डेमुक्त कोल्हापूर’साठी काँग्रेसचे
आज एकाचवेळी ८१ प्रभागांत आंदोलन

कोल्हापूर, ता. २७ : काँग्रेसच्यावतीने खड्डेमुक्त कोल्हापूरसाठी बुधवारी (ता. २८) शहरातील ८१ प्रभागांत एकाच वेळी निदर्शने केली जाणार आहेत. यामध्ये जास्तीत जास्त कोल्हापूरकरांनी आपापल्या प्रभागांतील आंदोलनात सहभागी व्हावे, असे आवाहन काँग्रेसचे जिल्हाध्यक्ष आमदार सतेज पाटील यांनी केले आहे.
आमदार सतेज पाटील आणि आमदार ऋतुराज पाटील यांच्या प्रमुख उपस्थितीमध्ये झालेल्या बैठकीत काँग्रेसचे माजी नगरसेवक, प्रमुख कार्यकर्ते उपस्थित होते. खड्ड्यांमुळे अपघात होत आहेत. गणेशोत्सव तोंडावर आहे. कोल्हापूरकरांमध्ये मोठा असंतोष असल्याने आंदोलनाचा निर्णय घेण्यात आला. त्यानुसार सकाळी नऊ वाजता एकाच वेळी निदर्शने करण्यात येणार आहेत. आमदार ऋतुराज पाटील यांनी खड्डे बुजविण्यासाठी महापालिकेकडे वारंवार मागणी केली. त्यावर कार्यवाही होत नसल्याने आंदोलन करण्यात येणार असल्याचे सांगितले.
यावेळी शहराध्यक्ष सचिन चव्हाण, शारंगधर देशमुख, सत्यजित जाधव, भूपाल शेटे, राजू लाटकर, आदी उपस्थित होते.