स्ट्रक्चरल ऑडिटचा
प्राथमिक अहवाल सोमवारी?

सकाळ वृत्तसेवा
कोल्हापूर, ता. ३० : संगीतसूर्य केशवराव भोसले नाट्यगृहाच्या जळितानंतर स्ट्रक्टवेल कंपनीमार्फत गेल्या आठवड्यात केलेल्या पाहणीनंतर प्राथमिक अहवाल तयार करण्यात आला आहे. हा अहवाल सोमवारी (ता.२) महापालिकेला सादर होण्याची शक्यता आहे.
आगीच्या घटनेनंतर १९ ऑगस्टपासून कंपनीने इंडोस्कोपी आणि इतर अत्याधुनिक साधनांच्या माध्यमातून विविध चाचण्या केल्या होत्या. काही नमुनेही तपासणीसाठी घेतले होते. प्राथमिक अहवालात तपासणी केलेल्या भागातील धोकादायक भाग कुठले व साधारण कुठले, याची माहिती दिली जाणार आहे. नमुन्यांची चाचणी होण्यास वेळ लागणार असून, अंतिम अहवालातच त्याचे निष्कर्ष समाविष्ट केले जाणार आहेत. हा प्राथमिक अहवाल सादर केल्यानंतर ढिगारा असलेल्या भागातील भिंतीची तपासणी केली जाईल. त्यातूनच अंतिम निष्कर्ष काढलेला अहवाल महापालिकेकडे सादर केला जाईल. त्यासाठी ढिगारा लवकरात लवकर काढावा लागणार आहे.