‘सुटा’ची घटना दुरुस्ती
अवाजवी मताने नामंजूर

सकाळ वृत्तसेवा
कोल्हापूर, ता. १५ : शिवाजी विद्यापीठ शिक्षक संघाच्या (सुटा) घटना दुरुस्तीबाबतचा ठराव आज झालेल्या वार्षिक सर्वसाधारण सभेत सभासदांनी अवाजवी मताने नामंजूर केला. अंबाई डिफेन्स येथील संघटनेच्या कार्यालयात सभा झाली.
दोन महिन्यांपासून सुटाच्या घटना दुरुस्तीच्या विषयाची चर्चा रंगली होती. चाळीस वर्षांपूर्वी सुटाच्या घटनेचे शिल्पकार प्रा. संभाजीराव जाधव यांनी सर्वसमावेशक, सर्वंकष, दूरदृष्टीने तयारी केलेली घटना सध्याच्या काही पदाधिकाऱ्यांनी स्वतःच्या स्वार्थासाठी चुकीच्या पद्धतीने दुरुस्त करण्याचा घाट घातला होता. सभासद आणि विश्वस्तांना अंधारात ठेवून मनमानीपणे सुटावर एकहाती कायमस्वरूपी वर्चस्व ठेवण्यासाठी घटना दुरुस्तीचा डाव आखला होता. त्यामुळे याबाबत सुटाचे विश्वस्त आणि मुख्यप्रवर्तक प्रा. एस. जी. पाटील यांनी पाच सप्टेंबर रोजी संघटनेच्या कार्यालयासमोर आत्मक्लेश आंदोलन केले होते. सभासदांनी एकत्र येऊन सुटा बचाव संघर्ष समितीची स्थापना केली. त्याद्वारे या घटना दुरुस्ती विरोधात आंदोलनाद्वारे आवाज उठविला. आज संघटनेच्या वार्षिक सर्वसाधारण सभेत घटना दुरुस्तीचा ठराव अवाजवी मताने सभासदांनी नामंजूर केला असल्याची माहिती सुटाचे कार्यालयीन कार्यवाह प्रा. डॉ. डी. एन. पाटील यांनी पत्रकाद्वारे दिली. दरम्यान, घटना दुरुस्तीचा वादग्रस्त ठराव असल्याने या सभेला सभासद आवर्जून उपस्थित होते.

चौकट
चुकीच्या गोष्टींना विरोध राहणार
घरगुती पद्धतीने संघटनेची घटना दुरुस्ती करण्याचा प्रयत्न काही लोकांनी सुरू केला. त्याविरोधात सुटा बचाव संघर्ष समितीने लढा दिला. त्याला सभासदांनी साथ दिली. त्यांच्या जोरावर आज घटना दुरुस्तीचा ठराव रद्द करण्यात यश मिळाले. संघटनेबाबतच्या चुकीच्या गोष्टी घडत राहिल्या, तर त्याला आमचा विरोध राहणार असल्याची प्रतिक्रिया संघर्ष समितीचे निमंत्रक डॉ. पाटील यांनी दिली.