राहूल गांधींच्या भेटीने
सनदे कुटुंबिय भारावले

कोल्हापूर, ता. ५ ः खासदार राहुल गांधी यांच्या रूपाने दिवाळीचा आनंद आजच आमच्या घरी आला, मला तर त्यांच्या रूपाने माझा भाऊच आल्याचा भास झाल्याची प्रतिक्रिया अंजना सनदे यांनी व्यक्त केली. राहुल गांधी घरातून निघून गेल्यानंतर हा अनुभव सांगताना सौ. सनदे यांना अश्रू अनावर झाले.
लोकसभेचे विरोधी पक्षनेते खासदार राहुल गांधी यांनी आज उचगाव (ता. करवीर) येथील अजय सनदे या दलित टेम्पोचालकाच्या घरी अचानक भेट दिली. अनपेक्षितपणे गांधी घरी आल्यानंतर तासभरात सनदे यांच्या घरात जे काही झाले ते सांगताना अंजना यांना आनंदाश्रू अनावर झाले. शिवाजी महाराजांच्या पुतळ्याचे अनावरण व इतर विविध कार्यक्रमांसाठी कोल्हापुरात आलेल्या राहुल गांधी यांनी अचानक सनदे कुटुंबीयांची त्यांच्या घरी जाऊन भेट घेतली. यामुळे सनदे कुंटुबियांना आश्‍चर्याचा धक्काच बसला. सुमारे पाऊणतास त्यांनी गप्पा मारल्या, जेवण बनवले व त्यांच्या समवेत खाल्लेही. हा प्रसंग आयुष्यभर विसरू शकणार नाही, अशी भावना अजय सनदे यांनी व्यक्त केली.