वसगडे क्रीडांगणासाठी
दोन हेक्टर जागा मंजूर

आमदार ऋतुराज पाटील, क्रीडांगणाचा होणार विकास

सांगवडेवाडी, ता. ९ ः येथील कोल्हापूर दक्षिण मतदारसंघातील वसगडे (ता. करवीर) येथे क्रीडांगण विकसासाठी २ हेक्टर ४० आर गायरान जमीन ग्रामपंचायतीला देण्यास शासनाने मान्यता दिली आहे. महसूल व वन विभागातर्फे आज हा शासन आदेश जारी केला. याबाबतची माहिती आमदार ऋतुराज पाटील यांनी दिली. पाठपुराव्याला यश आले असून वसगडेत क्रीडांगण विकसित होण्याचा मार्ग मोकळा झाल्याचे त्यांनी म्हंटले आहे.
विधान परिषदेचे गटनेते आमदार सतेज पाटील यांच्या मार्गदर्शनाखाली दक्षिण मतदारसंघातील विविध गावांमध्ये क्रीडांगणे विकसित केली जात आहेत. वसगडेत क्रीडांगण विकसनसाठी जागा नसल्याने गायरानातील जागा मिळण्यासाठी पाठपुरावा केला. ५ मार्च २०२४ रोजी महसूल व वनमंत्री राधाकृष्ण विखे पाटील यांना पत्र देऊन मागणी केली. त्यानुसार ‘क्रीडांगण'' या सार्वजनिक प्रयोजनासाठी अटी-शर्थीच्या आधीन राहून जिल्हा परिषदचे मुख्य कार्यकारी अधिकारी यांना प्रतिवर्ष १ रुपये नाममात्र दराने १५ वर्षांसाठी भाडेपट्टयाने प्रदान करण्याचा आदेश शासनाने दिला. क्रीडांगण विकासामुळे खेळाडूंची गैरसोय थांबणार असल्याचेही आमदार श्री. पाटील यांनी म्हटले आहे.