लोगो- सांस्कृतिक कोल्हापूर
...................
फोटो- २६२४०

राज्य नाट्य स्पर्धेसाठी संघांची जोरदार तयारी
सोमवारपासून प्रारंभ, ‘सीपीआर’, वैद्यकीय महाविद्यालय संघांचाही सहभाग

सकाळ वृत्तसेवा
कोल्हापूर, ता. १९ ः महाराष्ट्र शासनाच्या सांस्कृतिक कार्य संचालनालयातर्फे येथील केंद्रावरील राज्य नाट्य स्पर्धेला सोमवारपासून (ता. २५) प्रारंभ होणार आहे. एकूण वीस संघांनी सहभाग नोंदवला असून, यंदा दसरा चौकातील राजर्षी शाहू स्मारक भवनात रोज सायंकाळी सातला नाटकाचे प्रयोग होतील. दरम्यान, संघांच्या सराव तालमींना वेग आला आहे.
पंधरा डिसेंबरपर्यंत स्पर्धा होणार असून, सुगुण नाट्य संस्थेच्या ‘रायगडाला जेव्हा जाग येते’ या नाटकाने स्पर्धेचा पडदा उघडणार आहे. यंदाच्या स्पर्धेत एकूण वीस संघ असले तरी दोन संघ नव्याने स्पर्धेत उतरले आहेत. राजर्षी छत्रपती शाहू महाराज वैद्यकीय महाविद्यालयाचा संघ ‘टेक इट लाईकली’ हे नाटक सादर करणार असून, त्यामध्ये महाविद्यालयातील विद्यार्थी व विद्यार्थिनींचा सहभाग असेल. छत्रपती प्रमिलाराजे सर्वोपचार रुग्णालयाचा संघ ‘पद्मश्री धुंडिराज’ हे नाटक सादर करणार असून, या संघांत रुग्णालयातील डॉक्टर्स आणि कर्मचाऱ्यांचा सहभाग आहे. दरम्यान, यंदा राजर्षी शाहू स्मारक भवनात स्पर्धा होणार असल्याने आसन क्षमता कमी आहे. त्यामुळे विनामूल्य पासेस दिले जाणार नाहीत. सिझन तिकिटेही कमी केली जाणार असून, रोजच्या प्रयोगाच्या रोज प्रवेशिका घ्याव्या लागणार आहेत. दहा व पंधरा रुपये असे प्रवेशिका शुल्क राहणार आहे.
...........

२६२२६
कलापूरचा ‘सिनेमॅन’ कोलकत्ता फेस्टिव्हलमध्ये
बालचित्रपट चळवळ रुजवणाऱ्या अवलियाची कथा
सकाळ वृत्तसेवा
कोल्हापूर, ता. १९ ः येथील तरुणाईने साकारलेल्या ‘सिनेमॅन’ या सिनेमाची कोलकत्ता फिल्म फेस्टिव्हलसाठी निवड झाली आहे. स्पर्धा विभागातून या सिनेमाचा यानिमित्ताने इंडियन प्रीमियर होणार आहे. उमेश बगाडे लिखित व दिग्दर्शित या सिनेमात किशोर कदम, पृथ्वीराज चव्हाण, सिद्धार्थ बदी, रिचर्ड क्लेन, रिकी वूड यांच्या भूमिका आहेत. सुमित पाटील, उमेश बगाडे, सरिता पाष्टे, कौशल पाटील, अनिश नायर यांची निर्मिती आहे.
आनंद नावाचा एक सेवानिवृत्त शिक्षक आहे. गेल्या दशकापासून चिल्ड्रन्स फिल्म क्लबच्या माध्यमातून दुर्गम खेड्यांतील मुलांपर्यंत चित्रपट साक्षरता आणण्यासाठी त्यांचे प्रयत्न सुरू आहेत. लोकांच्या विरोधाला न जुमानता त्यांचा हा सारा प्रवास सुरू आहे. या प्रवासातील विविध रंजक घटना, मुलांतील सर्जनशीलता, सिनेमाचा समाजावरील परिणाम अशा विविध अंगांनी हा सिनेमा उलगडतो.
बगाडे यांच्या ‘अनाहुत’ या लघुपटाला २०१८ मध्ये सर्वोत्कृष्ट प्रेक्षक फिल्म पुरस्कार मिळाला असून, ‘चौकट’ लघुपटाची निवड २०१६ च्या आंतरराष्ट्रीय चित्रपट महोत्सवात ‘भारतीय पॅनोरमा’साठी झाली होती. ‘सिनेमॅन’ हा त्यांचा पहिलाच पूर्ण लांबीचा सिनेमा आहे. कोलकत्ता फेस्टिव्हलमध्ये सिनेमाची निवड ही आमच्या टीमसाठी अभिमानास्पद गोष्ट असल्याचे ते सांगतात.
............
२६२२७
चिल्लर पार्टीतर्फे
विद्यार्थ्यांसाठी रविवारी सिनेमा
कोल्हापूर, ता. १९ ः येथील चिल्लर पार्टी विद्यार्थी चित्रपट चळवळीतर्फे रविवारी (ता. २४) ‘अगेन्स्ट द वाईल्ड सरव्हाइव्ह द सेरेंगटी’ हा सिनेमा दाखवला जाणार आहे. राजर्षी शाहू स्मारक भवनात सकाळी दहा वाजता चित्रपट दाखवला जाणार असून, शालेय विद्यार्थ्यांना विनामूल्य प्रवेश असेल.
दक्षिण आफ्रिकेच्या जंगलातून एका मालवाहू विमानाने छोटे बहीण-भाऊ व त्यांचा कुत्रा घरी परतत असताना मध्येच त्या विमानाला अपघात होतो. विमान नष्ट होते. विमान चालकाचा अपघातात मृत्यू होतो आणि त्यानंतर त्या तिघांचाच प्रवास सुरू होतो, अशा मध्यवर्ती संकल्पनेवर हा सिनेमा बेतला आहे.