आरसीसी गटारींचे
७३ लाखांचे काम अपूर्ण

सकाळ वृत्तसेवा
गडहिंग्लज, ता. ३ ः भडगाव-जरळी-मुगळी- नूल-खणदाळ, नांगनूर राज्य हद्दीपर्यंतच्या रस्त्याच्या दोन्ही बाजूला आरसीसी गटर बांधण्यासाठी ७३ लाख ५४ हजारांचा निधी मंजूर आहे. त्याचे काम सुरू झाले असले तरी अनेक दिवसांपासून ते बंद आहे. अपूर्ण गटारीमुळे समस्यांना सामोरे जावे लागत असल्याची तक्रार मुगळीचे उमेश कटकोळे यांनी पत्रकाद्वारे केली आहे.
अर्थसंकल्पीय बजेटमधून या कामाला निधी मिळाला आहे. १७ जानेवारी २०२४ ला काम सुरू झाले. दहा महिन्यांत म्हणजेच १७ नोव्हेंबरला काम पूर्ण होणे अपेक्षित होते. मात्र मुदत संपूणही काम अजूनही अपूर्ण आहे. त्यामुळे स्थानिक नागरिकांना समस्यांना सामोरे जावे लागत आहे. मुगळी गावातील गटर बांधणी अपूर्ण आहे. स्थानिकांनी अनेकवेळा तक्रारी करूनही अद्याप काम सुरू झालेले नाही. सार्वजनिक बांधकामचे उपअभियंता आदित्य भोसले यांच्याकडेही काम तत्काळ सुरू करण्याची मागणी केली आहे. मुदतीत काम पूर्ण न झाल्याने ठेकेदारावर कारवाई करण्याची मागणी केली आहे. सार्वजनिक निधीचा अपव्यय होऊ नये यासाठी या अपूर्ण कामाबाबत ठोस निर्णय घ्यावा. याबाबत गांभीर्याने न घेतल्यास आंदोलनाचा इशाराही देण्यात आला आहे. याबाबत उपअभियंता भोसले म्हणाले, ‘झालेल्या कामाची बिले मिळाली नसल्याने काम बंद केल्याचे ठेकेदार सांगत आहे. कामही संथगतीने सुरू केले आहे. परंतु काम पूर्ण करण्याच्या सूचना दिल्या असून न झाल्यास दंडात्मक कारवाई करण्यात येईल असे ठेकेदाराला कळविले आहे.’