नृसिंहवाडीत आजपासून
दत्त जयंती सोहळा

१५ डिसेंबर पर्यंत विविध कार्यक्रमांचे आयोजन

सकाळ वृत्तसेवा
नृसिंहवाडी, ता. ७ ः येथील दत्त मंदिरात रविवार (ता. ८) ते १५ डिसेंबर अखेर दत्तजयंती उत्सव सोहळा संपन्न होणार आहे. यानिमित्त भक्तीगीते, गायन, भावगीते, अभंग, तबलावादन, पंचपदी कीर्तन, पालखी सोहळा असे विविध धार्मिक कार्यक्रम दत्त मंदिर परिसरामध्ये भाविकांना अनुभवण्यास मिळणार आहे. भाविकांसाठी दत्त मंदिराच्या दक्षिण- उत्तर बाजूस भव्य सभामंडप, पिण्याचे शुद्ध पाणी, स्वच्छतागृह, दर्शन रांगा, महाप्रसाद या सुविधा उपलब्ध करून देण्यात येणार आहेत.
उत्सव काळामध्ये दररोज दुपारी चार ते पाच या वेळेमध्ये दिलीप शास्त्री उपाध्ये यांचे पुराण तसेच रात्री साडेनऊ ते सव्वा अकरा या कालावधीत भालचंद्र देव केज (आंबेजोगाई) यांचे कीर्तन होणार आहे. याशिवाय भाग्यश्री अनिरुद्ध चरणकर (कोल्हापूर), ॲड. दिलीप प्रभाकर ठाकूर (मालवण), किशोर कुमार फॅन क्लबचे विवेक शेट्टी, मुकुंद बादरायणी (चिंचवड), जोसना गणफुले, प्रफुल गणपुले, श्रद्धा कौस्तुभ जोशी- दांडेकर (मिरज), श्रीया गणेश कुलकर्णी (सांगोला), अमोल निसळ (पुणे) आदी विविध मान्यवरांना कार्यक्रमासाठी निमंत्रित करण्यात आले आहे. देवस्थानचे अध्यक्ष वैभव पुजारी व सचिव संजय पुजारी, सर्व पदाधिकारी उत्सवासाठी परिश्रम घेत आहेत.
ग्रामपंचायत च्या वतीने भाविकांसाठी दोन चाकी व चार चाकी पार्किंग व्यवस्था करण्यात आली असून, मुख्य रस्त्यावर बॅरीकेट्स बसवण्यात आले आहेत. त्यामुळे वाहतुकीची कोंडी कमी होण्यास मदत होणार आहे. पिण्याच्या पाण्याच्या टाक्या ग्रामपंचायत कर्मचाऱ्यांनी शुद्ध केल्या आहेत. मुख्य चौकातील परिसरात स्वच्छता ठेवण्यात आली आहे. बागेतील जागेची स्वच्छता करण्यात आली असून, त्या ठिकाणी भाविकांना बसण्यासाठी स्वतंत्र प्रशस्त जागा तयार केली आहे. सरपंच चित्राताई सुतार, उपसरपंच रमेश मोरे, गटनेते धनाजीराव जगदाळे, सदस्य चेतन गवळी व सदस्य यासाठी विशेष परिश्रम घेत आहेत.