31460

जिना यहॉं, मरना यहॉं...
‘म्युझिक लव्हर्स’ग्रुपतर्फे राज कपूर यांना अभिवादन

सकाळ वृत्तसेवा

कोल्हापूर, ता. १३ ः विविध क्षेत्रात उल्लेखनीय यश मिळवलेल्या व्यक्तींचा सन्मान सोहळा आणि द ग्रेट शो मॅन राज कपूर यांच्या जन्मशताब्दीनिमित्त त्यांच्या गाण्यांनी सजलेल्या कार्यक्रमाने म्युझिक लव्हर्स ग्रुपचा तिसरा वर्धापनदिन सोहळा झाला. देवल क्लबमध्ये रंगलेल्या या सांगीतिक कार्यक्रमात ग्रुपच्या सदस्यांनी राज कपूर यांच्यावर चित्रित झालेली गाणी गात त्यांच्या स्मृतींना उजाळा दिला.
ज्येष्ठ अभिनेते डॉ. शरद भुताडिया यांच्या हस्ते अभिनेते भरत दैनी, राष्ट्रीय शिक्षक पुरस्कार विजेते सागर बगाडे, ऐतिहासिक कला जपणारे संदीप सावंत यांचा सन्मान करण्यात आला.
सन्मान सोहळ्यानंतर ‘दिल का हाल सुने दिलवाला’ हे गीत गात महावीर तीपन्नवर यांनी सांगीतिक कार्यक्रमाला सुरूवात केली. यानंतर ‘सजन रे झूठ मत बोलो’, ‘ओ बसंती पवन पागल’, ‘बोल राधा बोल संगम होगा के नहीं’, ‘पान खायो सय्या’, ‘भवरे कि गुंजन’, ‘ए भाई जरा देख के चलो’, ‘मैं हुं प्रेमरोगी’ अशी गीते सादर झाली. आशुतोष साळोखे, जास्वंदी कुलकर्णी, सुरेश कांदेकर, मोनिका बकरे, शेखर तिवले, संजीव पाटील, शिरीष पाटील, प्रियंका वालावलकर, श्रद्धा गुळवणी, उमेश साळोखे, डॉ. संदीप पाटील व धनश्री नाझरे यांनी गीते गायली. यावेळी डॉ. डी. वाय. पाटील विद्यापीठाचे कुलगुरू राकेशकुमार मुदगल, राजेंद्र बुगडे उपस्थित होते.

चौकट
लक्षवेधी सादरीकरण
डॉ. संदीप पाटील यांनी मैफलीत ‘जिना यहॉं मरना यहाँ इसके सिवा जाना कहाँ'' हे गीत सादर केले. त्यासाठी त्यांनी खास जोकरची हुबेहूब वेशभूषा केली. त्यांचे हे सादरीकरण लक्षवेधी ठरले.