इचलकरंजी महापालिका उपायुक्तांच्या
मोटारला ट्रॅक्टर-ट्रॉलीने दिली धडक

इचलकरंजी, ता. ७ ः इचलकरंजी महापालिकेचे उपायुक्त प्रसाद काटकर यांच्या मोटारीला ट्रॅक्टर-ट्रॅालीने धडक दिली. यामध्ये ते थोडक्यात बचावले. त्यांना शारीरिक इजा झाली नाही, मात्र त्यांचा चालक किरकोळ जखमी झाला. स्टेशन रोडवरील डॉ. बाबासाहेब आंबेडकर पुतळा परिसरात आज दुपारी तीन वाजता हा अपघात झाला. यामध्ये उपायुक्त काटकर यांच्या मोटारीच्या चालकाकडील बाजूचे मोठे नुकसान झाले असून, अपघातस्थळी काचांचा खच पडला होता.
उपायुक्त काटकर हे आज महापालिका कामकाजाबाबत एका ठिकाणी बैठकीला गेले होते. तेथील बैठक आटोपून ते स्टेशन रोडमार्गे महापालिका कार्यालयाकडे परतत होते. डॉ. आंबेडकर पुतळ्याजवळ आले असता चुकीच्या दिशेने आलेल्या ट्रॅक्टर-ट्रॅालीने चालकाच्या दरवाजाच्या बाजूला जोरात धडक दिली. केएटीपी मैदानातील साहित्य भरून ट्रॅक्टर-ट्रॅाली इंडस्ट्रियल इस्टेटकडे जात होती. सुदैवाने दोन्ही वाहनांचा वेग मर्यादित होता. वाहतुकीची मोठी वर्दळ नव्हती. त्यामुळे मोठा अनर्थ ठळला. अपघातानंतर भीतीने ट्रॅक्टरचालक पळून गेला.