37118

बिनखांबी - मिरजकर तिकटी
एकेरी मार्ग धोकादायक

दिवसाढवळ्या वाहनधारकांकडून उल्लंघन; वाहतूक पोलिस गायब

सकाळ वृत्तसेवा

कोल्हापूर, ता. ७ : मंगळवार पेठ परिसरातील बिनखांबी गणेश मंदिर ते मिरजकर तिकटी हा वाहतुकीसाठी असणारा एकेरी मार्ग अतिशय धोकादायक झाला आहे. दिवसाढवळ्या या मार्गावर उलट्या दिशेने वाहने नेऊन कायद्याची पायमल्ली केली जात आहे. या ठिकाणी वाहतूक नियंत्रण शाखेचे पोलिस दिसत नाहीत. बहुतांशवेळा ते गायब असल्याचेच दिसत आहे. त्यामुळेच बिनदिक्कतपणे सर्व प्रकारची वाहने अगदी बिनधास्त एकेरी वाहतुकीचा नियम तोडत असल्याचे चित्र आहे.
बिनखांबी मंदिर ते मिरजकर तिकटी हा मार्ग अतिशय दाटीवाटीचा व रहदारीचा मार्ग आहे. त्यामुळेच येथे एकेरी वाहतूक करण्यात आली आहे. या मार्गावरच एक शाळा व एक अंधशाळा आहे. येथील विद्यार्थ्यांना उलट दिशेने येणाऱ्या या वाहनांमुळे धोका निर्माण होऊ शकतो. एकेरी वाहतुकीचा फलक स्पष्ट दिसत नाही. त्यामुळे बाहेरहून आलेल्या पर्यटकांची मोठी वाहने थेट या एकेरी मार्गावरून जातात. काही वाहने पुढे करवीर निवासिनी अंबाबाई मंदिर येथे, तर काही येथील शाळांच्या दारातच उभी केली जातात. त्यामुळे मोठ्या प्रमाणात वाहतुकीची कोंडी होऊन स्थानिक नागरिकांनाही याचा त्रास होत आहे.