आहेर होतोय, लग्नातून बाहेर
ट्रेंड बदलतोय ः दारातील लग्नसोहळा गेलाय हॉलला

अनिल एच. मोरे ः सकाळ वृत्तसेवा
बोरपाडळे, ता.२४ : लग्न म्हणजे दोन व्यक्तींची मने, घरे, गावे आणि संस्कार एकत्र आणणारा समारंभ. दोन भागातील चालीरिती, परंपरा अन् आचार विचारांना जुळवणाऱ्या या सोहळ्याचे स्वरूप बदलत आहे.
पूर्वी ग्रामीण भागात लग्न म्हणजे गाव सोहळा व्हायचा. लग्नात आहेर हा तर अगदी जिव्हाळ्याचा विषय असायचा. ऐपतीप्रमाणे प्रत्येकजण आहेर करायचा. याचे वाचनही जाहीरपणे व्हायचे लाऊड स्पीकरवर. पण सध्या आहेर लग्न सोहळ्यातून बाहेर जातोय की काय अशी परिस्थिती आहे. फक्त फुलांचा बुके बस्स. पूर्वी एखाद्या श्रीमंताच्या सोहळ्यात ‘नो आहेर''ची हाक असायची. आता सर्रास लग्न समारंभात ‘आपली उपस्थिती हाच आहेर'' असे लिहल जाते. दारातील लग्न सोहळ्याची पद्धतही हॉलला गेली. त्यामुळे घरी येणाऱ्या, मुक्कामाची पाहुण्यांची प्रथा थांबली. लग्नामध्ये पै- पाहुणे, ग्रामस्थ तसेच मानकऱ्यांना पसंती दिली जायची. आता कार्यालयाच्या दारात हलगी कडाडते.

कोट
परिवर्तन हा जरी निसर्गाचा नियम असला तरी मंगलाष्टकासमयी अक्षता फेकून मारणे, हार घालताना नवरीला उंच उचलणे, वरातीप्रसंगी उंची आवाजावर हिडीस नृत्य आदी प्रकार लग्न संस्कारास बाधक आहेत. प्रेम, आपुलकी अन् जिव्हाळा हळूहळू कमी होतोय.
- श्रीकांत जोशी, बोरपाडळे

कोट
दारातील लग्नाला नवयुवकांची नापसंती आहे. शिवाय जेवणांसह इतर उठाठेवही जमत नाही. वेगवेगळ्या इव्हेंटसाठी हॉललाच पसंती दिली जात आहे.
- के.एस. पाटील, सामाजिक कार्यकर्ते.