फोटो 54111
ताराराणी चौकातील पदपथ परिसराचे
अयोध्या डेव्हलपर्सतर्फे सुशोभीकरण

कोल्हापूर, ता. २८ ः ‘स्वच्छ कोल्हापूर, सुंदर कोल्हापूर’ योजनेंतर्गत छत्रपती ताराराणी चौकातील विभागीय कार्यालयासमोरील पदपथ परिसराचे सुशोभीकरण अयोध्या डेव्हलपर्सचे व्ही. बी. पाटील यांनी केले. त्याचे उद्‍घाटन प्रशासक के. मंजुलक्ष्मी यांच्या हस्ते आज झाले.
चौकात विभागीय कार्यालयाची इमारत आहे. त्यासमोरील मुख्य रस्त्यालगत पदपथ आहे. शहराचे मुख्य प्रवेशद्वार असलेला हा परिसर अनेक वर्षे दुर्लक्षित होता. तिथे असलेल्या झाडांच्या सावलीमुळे भिकाऱ्यांची संख्या वाढत चालली होती. तसेच परिसरही गलिच्छ होत होता. त्याठिकाणी येणाऱ्या नागरिकांना, प्रवाशांना त्रास होत होता. अशा चार हजार चौरस फुटाचा परिसर स्वच्छ आणि सुशोभित करून पेव्हिंग ब्लॉक बसविले आहेत. तसेच १५० फूट लांबीचा ग्रॅनाईट टाईल्सचा कट्टाही तयार करण्यात आला असून, प्रवाशांच्या बैठकीची व्यवस्था झाली आहे. यावर सात ते आठ लाख रुपये खर्च झाले आहेत. यावेळी व्ही. बी. पाटील, शहर अभियंता नेत्रदीप सरनोबत, उपशहर अभियंता रमेश कांबळे, अभियंता मीरा नगिमे, अवधूत नेर्लेकर, उमेश बागुल आदी उपस्थित होते.